ایک نیوز :مسلم لیگ (ن) کی سینئر نائب صدر مریم نواز نے کہا ہے کہ ہم 28 مئی والے ہیں 9 مئی والے نہیں ایک تاریخ پاکستان کو سنوارنے کی ہے اور ایک تاریخ اجاڑنے کی، 28 مئی والوں ںے ملک بنایا اور 9 مئی والے ملک میں آگ لگانے والے ہیں۔
تفصیلات کےمطابق حافظ آباد میں (ن) لیگ کے انتخابی جلسہ عام سے خطاب کرتے ہوئے مریم نواز نے کہا کہ نواز شریف نے واضح طور پر کہا ہے کہ ہم 28 مئی والے ہیں 9 مئی والے نہیں، یہ دونوں کوئی معمولی واقعات نہیں ان کے پیچھے پوری داستان ہے۔انہوں نے کہا کہ جس شخص نے ملک کو ایٹمی قوت بنایا وہ آج یہاں بیٹھا ہے، 28 مئی والوں نے ملک سنوارا اور 9 مئی والوں نے ملک کو بگاڑا، ایک تاریخ پاکستان کو سنوارنے کی ہے اور ایک تاریخ اجاڑنے کی، 28 مئی والوں ںے ملک کو بنایا جب کہ 9 مئی والے ملک میں آگ لگانے والے ہیں۔
مریم نواز نے کہا کہ 9 مئی والے چار سال رہنے کے باوجود ملک میں مہنگائی کو لانے کے ذمہ دار ہیں، جب کہ 28 مئی والوں نے نوجوانوں کے ہاتھوں میں روزگار اور لیپ ٹاپ دیے، روٹی سستی کی اور سڑکوں کا جال بچھایا، حافظ آباد والے بتائیں وہ 8 فروری کو 28 مئی والوں کا ساتھ دیں گے یا نو مئی والوں کا ؟
ان کا کہناتھا کہ 8فروری کو حافظ آباد میں شیر دھاڑے گا،مجھے یقین ہے نوازشریف کا پیغام حافظ آباد کے گھر گھر پہنچے گا،نوازشریف کو واپس لانے کی جدوجہد میں آپ ساتھ نہ دیتے تو میرے لئے بہت مشکل تھا،ان کا کہناتھا کہ نوازشریف نے پاکستان کو ترقی کی راہ پر گامزن کیا،نوازشریف کے دور حکومت میں سکول،کالجز،ہسپتال بنے، 9مئی والے اپنی حرکتوں کی وجہ سے جیل کی سلاخوں کے پیچھے ہیں۔