ایک نیوز نیوز: آج بروزجمعرات 18 اگست کو طوفانی بارش کی پیشگوئی کے بعد تعلیمی اداروں میں عام تعطیل اور سالانہ امتحانات، پریکٹیکل ملتوی کرنے کا اعلان کیا گیا ہے۔تمام ملتوی شدہ پرچے 25 اگست کو انہی مراکز پر ہوں گے۔
تفصیلات کے مطابق صوبائی وزیر بورڈزوجامعات اسماعیل راہونے بھی بارش کے پیشِ نظر آج 18 اگست کو تمام سکولوں میں چھٹی کا اعلان کیا ہے۔ صوبائی وزیر کے جاری کردہ بیان کے مطابق تیز بارش کے باعث جامعات میں چھٹی دی گئی ہے۔ دوسری جانب جامعہ اردو کراچی کیمپسز میں بھی آج بارشوں کے سبب تعطیل ہوگی۔
اس سے قبل صوبے میں مزید تیز بارشوں کی پیش گوئی کے پیش نظر سندھ حکومت نے آج تمام تعلیمی اداروں میں چھٹی کا اعلان کیا تھا۔ وزیر تعلیم سندھ سردار شاہ نے کہا کہ وزیراعلیٰ کی ہدایت پر کراچی میں آج جمعرات کو تمام تعلیمی ادارے بند رہیں گے۔
دوسری جانب وزیراعلیٰ سندھ سید مراد علی شاہ نے شہر قائد میں مزید بارشوں کی پیشگوئی کی وجہ سے محکمہ تعلیم کو چھٹی دینے کی ہدایات جاری کی تھی۔
اس کے علاوہ جامعہ این ای ڈی، ملحقہ کالجز اور تھر انسٹی ٹیوٹ آف انجینیرنگ اور سائنس اینڈ ٹیکنالوجی میں بھی 18 اگست 2022 کو حکومت سندھ کے اعلان کے مطابق بارشوں کے پیشِ نظر تعطیل ہوگی۔ 18 اگست کو ہونے والے امتحانات بھی ملتوی کردیئے گئے ہیں۔
اس سے قبل ڈپٹی کمشنر حیدرآباد کے دفتر سے بھی حکم نامہ جاری کیا گیا۔ جس میں بتایا گیا کہ محکمہ موسمیات نے سندھ بھر میں مزید بارشوں کی پیشگوئی ہے جس کی وجہ سے 18 اگست کو حیدرآباد میں تمام نجی اور سرکاری اسکولوں میں تعطیل ہوگی۔
ڈپٹی کمشنر فواد سومرو نے کہا ہے کہ شہر میں سرکاری و نجی تعلیمی ادارے اور کاروباری مراکز کل بند رہیں گے۔
آل سندھ پرائیویٹ اسکولز اینڈ کالجز ایسوسی ایشن کے چیئرمین حیدر علی نے آج تمام نجی اسکولز اور کالجز میں چھٹی کا اعلان کیا ہے۔
کراچی میں انٹر بورڈ کے تحت ہونے والے آرٹس پرائیوٹ اور ریگولر اور سائنس کے پریکٹیکل پرچوں کو بھی ملتوی کردیا گیا ہے۔
بورڈ کے مطابق یہ امتحانات اب رواں ماہ 25 اگست بروز جمعرات کو ہونگے۔
