ایک نیوز: ایشیا کپ کے حوالے سے پاکستان کرکٹ بورڈ نے ہائبرڈ فارمولے کے لیے دبئی کو ترجیحی وینیو قرار دے دیا ہے۔
رپورٹ کے مطابق دبئی کو ترجیحی وینیو گیٹ منی کی وجہ سے قرار دیا گیا ہے۔ پی سی بی نے موقف اپنایا ہے کہ کولمبو یا کسی اور وینیو سے دبئی کی طرح گیٹ منی حاصل نہیں ہو سکتی ہے۔ دبئی کے علاوہ کسی اور وینیو کی وجہ سے گیٹ منی کا نقصان ایشین کرکٹ کونسل کو پورا کرنا چاہیے۔ پی سی بی کو ازسر نو پیش کیے جانے والے ہائبرڈ فارمولے کے منظور ہونے کی بھی امید ہے اور سری لنکا اور بنگلادیش کی یقین دہانی کے بعد پی سی بی جلد فیصلے کے لیے پُراعتماد ہے۔
اے سی سی کے اجلاس کے حوالے سے پی سی بی کو تاحال نہیں بتایا گیا لیکن پی سی بی کو یقین ہے کہ ہائبرڈ فارمولے میں پاکستان کی ترجیح کو اہمیت دی جائے گی۔ ہائبرڈ فارمولے میں پاکستان نیپال کے خلاف میچ اپنے ملک میں کھیلے گا، 3 میچز میں بنگلادیش، افغانستان اور سری لنکا کی ٹیمیں آمنے سامنے ہوں گی۔ ٹورنامنٹ میں بھارت کے گروپ میچز، ٹاپ چار ٹیموں اور فائنل ہائبرڈ فارمولے کے وینیو پر ہوگا۔