ایک نیوز :آرمی چیف کی زیر صدارت کورکمانڈرز کانفرنس میں فوج کی اعلیٰ قیادت نے معیشت کی بحالی کے لیے حکومت کی ہر ممکن معاونت کرنے کے عزم کا اظہار کیا ہے۔
پاک فوج کے شعبہ تعلقات عامہ (آئی ایس پی آر) کے مطابق چیف آف آرمی اسٹاف جنرل سید عاصم منیر کی زیر صدارت جی ایچ کیو میں 258ویں کور کمانڈرز کانفرنس کا انعقاد کیا گیا۔
فورم کو حکومت کے اقتصادی بحالی کے منصوبے اور خصوصا نئی تشکیل دی جانے والی فیسلیٹیشن کونسل، زراعت، کان کنی، معدنیات اور دفاعی پیداوار کے شعبوں میں فوج کے کردار کے بارے میں بھی آگاہ کیا گیا۔
شرکاء نے اس عزم کا اظہار کیا کہ حکومت پاکستان کی جانب سے معیشت کی بحالی کے لیے منصوبہ بندی اور حکمت عملی کے اقدامات کی ہر ممکن تکنیکی اور انتظامی معاونت فراہم کی جائے گی۔
اس موقع پر فورم نے دہشت گردی کے خطرے کے خلاف مادر وطن کے دفاع میں بہادر سپاہیوں کی مسلسل قربانیوں کو زبردست خراج تحسین پیش کیا جبکہ کانفرنس میں شرکا کو داخلہ سلامتی کی موجودہ صورت حال پر بریفنگ بھی دی گئی۔
آئی ایس پی آر کے مطابق کالعدم ٹی ٹی پی اور اس کے دیگر گروہوں کے دہشت گردوں کو پڑوسی ملک میں محفوظ پناہ گاہیں اور کارروائی کی آزادی اور دہشت گردوں کو جدید ترین ہتھیاروں کی دستیابی پر افسوس کا اظہار کیا گیا جبکہ پاک فوج کی آپریشنل تیاریوں اور تربیتی پہلوؤں پر بھی تفصیل سے غور کیا گیا۔
آرمی چیف جنرل سید عاصم منیرکاکہنا ہے کہ ہماری قومی سلامتی کو درپیش خطرات کا مقابلہ کرنے کےلیے ہمیں ہر وقت تیار رہنا چاہیے۔ افواج پاکستان کی ٹریننگ اور پیشہ ورانہ تیاریاں پاکستان کی داخلی سلامتی کے لیے ضروری ہیں۔کالعدم ٹی ٹی پی اوردیگردہشت گردتنظیموں کےہمسایہ ملک میں ٹھکانےہیں۔ ٹی ٹی پی اوردیگردہشت گردگروپ پاکستان میں مسائل پیداکررہےہیں۔ معروضی تربیت ہماری پیشہ ورانہ مہارت کاخاصہ ہے۔