ایک نیوز: وفاقی دارالحکومت اسلام آباد میں گزشتہ دو سال کے دوران جرائم کی شرح میں کمی کا انکشاف ہوا ہے، وفاقی وزیر داخلہ محسن نقوی نےاس حوالے سے تحریری جواب قومی اسمبلی میں جمع کرا دیا۔
تفصیلات کے مطابق وفاقی وزیرداخلہ محسن نقوی نے اپنے تحریری جواب میں کہا ہے کہ 2023 کے مقابلے میں 2024 میں 11 فیصد کم جرائم ہوئے،سال 2024 میں 1ہزار 596 مجرموں پر مشتمل 686 گینگز کو پکڑا گیا ،2024 میں 80 کروڑ 26 لاکھ سے زائد مالیت کی چوری شدہ اشیاء کو برآمد کیا گیا، ڈالفن فورس، موبائل پیٹرولنگ یونٹس اور 15 کے ذریعے شہریوں کو محفوظ بنایا جا رہا ہے۔
وفاقی وزیرداخلہ کا کہنا ہے سال 2024 میں کل 231 سرچ آپریشنز منعقد کئے گئے ،ہوٹل آئی ایپ کے ذریعے 200 ملزمان کی گرفتاری عمل میں لائی گئی ،اس وقت دارالحکومت میں مختلف لوکیشنز پر 3159 سی سی ٹی وی کیمرہ لگائے گئے ہیں، 2024 میں مشتبہ افراد کے خلاف 5000 سی ڈی آرز کا تجزیہ کیا گیا۔