چیمپئنز ٹرافی،افتتاحی تقریب، آئی سی سی آفیشلز سمیت نامور کرکٹرز کی شرکت

ویب ڈیسک:لاہورمیں چیمپئینز ٹرافی کی افتتاحی تقریب کا انعقاد کیا گیا جس میں آئی سی سی آفیشلز، پی سی بی عہدیداران سمیت قومی و انٹرنیشنل کرکٹرز نے شرکت کی۔
لاہور کے شاہی قلعہ گراؤنڈ میں چیمپئنز ٹرافی کی افتتاحی تقریب میں آئی سی سی کے چیف ایکزیکٹیو جیف ایلر ڈائس، چیئرمین پی سی بی محسن نقوی، صوبائی وزیر کھیل فیصل ایوب کھوکھر، سپیکر پنجاب اسمبلی ملک احمد خان بھی شریک ہوئے۔
چیئر مین پی سی بی کے ایڈوائزر عامر میر اور وہاب ریاض کے علاوہ2017میں چیمپئنز ٹرافی جیتنے والی قومی ٹیم کے کھلاڑی سرفراز احمد ، جنید خان ، حسن علی ، اظہر علی،محمد عامر ، شاداب خان اور عماد وسیم اور حارث سہیل تقریب میں شریک ہوئے۔
غیر ملکی کھلاڑیوں میںسابق جنوبی افریقن بلے باز جے پی ڈومنی اور کیوی فاسٹ باؤلر ٹم ساؤتھی نے بھی افتتاحی تقریب میں شرکت کی۔
افتتاحی تقریب سے خطاب میں چیئرمین پی سی بی محسن نقوی کا کہنا تھا کہ قذافی سٹیڈیم کو آئی سی سی چیمپئنز ٹرافی کے لیے مکمل کیا، پاکستان میں چیمپئنز ٹرافی کا ہونا تاریخی موقع ہے، چیمپئنز ٹرافی کیلئےچار ٹیمیں یہاں پہنچ چکی ہیں، افغانستان، نیوزی لینڈ، جنوبی افریقہ اور پاکستان یہاں موجود ہیں۔
آئی سی سی کے چیف ایگزیکٹو جیف ایلڈائس نے لاہور کے شاہی قلعے میں منعقدہ چیمپئنز ٹرافی 2025 کی افتتاحی تقریب سے خطاب کرتے ہوئے کہا ہے کہا اگلے دو ہفتوں تک شائقین کو بہترین کرکٹ دیکھنے کو ملے گی،پاکستان کے پاس کرکٹ سے اپنے جنون کو دکھانے کا سنہری موقع ہے، میں نے اوول میں پاکستان ٹیم کو چیمپیئنز ٹرافی جیتتے دیکھا ہے۔
چیمپئنز ٹرافی کے ایمبیسیڈر اور سابق کپتان قومی ٹیم سرفراز احمد کا کہنا تھا کہ آپ سب کو یہاں خؤش آمدید کہتا ہوں، ہم نے2017میں ایونٹ جیتا اب یہ ایونٹ پاکستان میں ہو رہا ہے، ہم اس ایونٹ کے لئے کافی پرجوش ہیں۔
آئی سی سی چیمپئنز ٹرافی کے ایمبیسیڈر ٹم سائوتھی نے کہا کہ نیوزی لینڈ کی ٹیم پاکستان میں تاحال اچھے ردھم میں ہے، بہت اچھا لگا ہے پاکستان میں کھیل کر، تمام ٹیمیں ٹرائی سیریز میں اچھا کھیلیں۔