ایک نیوز: کراچی میں بیرون ملک سے آنے والے مسافروں کو لوٹنے والا وائٹ کرولا گینگ سرگرم ہوگیا ہے۔
رپورٹ کے مطابق وائٹ کرولا گروہ کے اہلکار پولیس وردیوں میں ملبوس ہو کر کارروائی کرتے ہیں۔حالیہ واقعہ لیاقت آباد 3 نمبر میں پیش آیا جہاں عمرہ کرکے واپس آنے والے میاں بیوی کو گھر کے باہر لوٹ لیا گیا۔پولیس کی وردی میں ملبوس تین ملزمان میاں بیوی سے ملکی اور غیر ملکی کرنسی لوٹ کر فرار ہوگئے۔واقعے کا مقدمہ تھانہ سپرمارکیٹ میں درج کرلیا گیا ہے۔
متاثرہ شہری اور اسکی اہلیہ جدہ سے کراچی آئے وہ جیسے ہی ائرپورٹ سے گھر کے پہنچےتو ایک وائٹ کرولا آکر رکی جس میں پولیس کی وردی میں ملبوس تین افراد سوار تھے۔ لوٹ مار کا نشانہ بننے والی شہری کا کہنا ہےکہ ملزمان کے پاس اسلحہ تھا، انہوں نے ہمارے پاسپورٹ اور شناختی کارڈ چیک کیے، تلاشی کے بہانے اہلیہ کے ہاتھ سے پرس چھینا اور فرار ہوگئے۔
ملزمان 2200 سعودی ریال،5 آسٹریلین ڈالر،10 درہم اور 5 ہزار پاکستانی روپے لوٹ کر فرار ہوئے۔
پولیس کا کہنا ہے کہ شبہ ہے کہ ملزمان نے ائیر پورٹ سے میاں بیوی کا پیچھا کیا اور گھر تک پہنچے، واقعہ کا مقدمہ درج کرکے تحقیقات شروع کردی گئی ہے۔پولیس کے مطابق جائے وقوعہ کے اطراف لگے سی سی ٹی وی کیمروں کی فوٹیج بھی حاصل کی جارہی ہے۔