ایک نیوز:صدر مملکت آصف علی زرداری نے ترکمانستان کی کابینہ کے ڈپٹی چیئرمین اور وزیر خارجہ راشد میردوف سے ملاقات کی ہے۔
تفصیلات کےمطابق ملاقات میں صدر مملکت نے پاکستان اور ترکمانستان کے درمیان اقتصادی تعاون ، کاروباری تعلقات بڑھانے کی ضرورت پر زور دیا ۔
اس موقع پر صدر مملکت آصف علی زرداری نے کہا دونوں ممالک کے مابین اقتصادی تعاون بہتر بنانے کیلئے دونوں ممالک کی اسٹاک ایکسچینج کے درمیان روابط بڑھانا ہوں گے، پاکستان ترکمانستان کے ساتھ اپنے تعلقات کو بہت اہمیت دیتا ہے، پاک ترکمان تعلقات مشترکہ اقدار، مذہب اور ثقافت پر مبنی ہیں، خطے میں مشترکہ خوشحالی ،استحکام اور دونوں ممالک کی عوام کی بہتری کیلئے مل کر کام کرنے کی ضرورت ہے ۔
صدر مملکت نے تاپی گیس پائپ لائن منصوبے کی جلد تکمیل کے لیے پاکستان کے عزم کا اعادہ کرتے ہوئے کہا تاپی گیس پائپ لائن منصوبہ دونوں ممالک کی اقتصادی ترقی میں مفید ثابت ہوگا۔
راشد میردوف نے عَشق آباد میں مخدوم گلی فراغی کے 300ویں یوم پیدائش کے موقع پر بین الاقوامی فورم میں شرکت پر صدر ِمملکت کا شکریہ ادا کرتے ہوئے کہا صدر ِ پاکستان کی عَشق آباد میں بین الاقوامی فورم میں شرکت ترکمان عوام کیلئے احترام کی عکاس ہے، راشد میردوف نے ترکمانستان کے صدر اور ترکمان عوام کے قومی رہنما کا صدر آصف علی زرداری کیلئے خصوصی تہنیتی پیغام بھی پہنچایا ۔
صدر مملکت نے شنگھائی تعاون تنظیم کے رکن ممالک کی حکومتوں کے سربراہان کی کونسل کے 23 ویں اجلاس میں شرکت پر راشد میردوف اور عَشق آباد دورے کے دوران پرتپاک مہمان نوازی پر ترکمانستان کی حکومت شکریہ ادا کیا۔