ویب ڈیسک: چاہت فتح علی خان نے پی سی بی کو بڑی پیشکش کر دی۔
سوشل میڈیا پر اپنے بےسُرے گانوں کیوجہ سے شہرت پانیوالےگلوکار چاہت فتح علی خان نے ٹی ٹوئنٹی ورلڈکپ میں پاکستان کی شکست اور ایونٹ سے باہر ہونے پر پاکستان کرکٹ بورڈ کو پیشکش کرتے ہوئے کہا ہے کہ بورڈ مجھے چیئرمین بنا دے ٹیم ہر میچ جیتے گی۔
چاہت فتح علی خان نےلندن میں گفتگو کرتے ہوئے کہا کہ پاکستان کرکٹ بورڈ کو چیئرمین کے لیے تجربہ کار کرکٹر کی ضرورت ہے، میں چاہتا ہوں کہ مجھے بورڈ کا چیئرمین بنا دیا جائے تو میں ہفتے میں چار دن خود گراؤنڈ میں جاکر کھلاڑیوں کی پرفارمنس اور کوچنگ کا جائزہ لوں گا۔
اُنہوں نے کہا کہ میں قومی ٹیم کے لیے صرف ایک ہی کوچ منتخب کروں گا اور خود جاکر دیکھا کروں گا کہ میرا منتخب کیا گیا کوچ ہماری قومی ٹیم کی کیسی کوچنگ کررہا ہے، چاہت فتح علی خان کی بات سُن کر صحافی نے اُن سے پوچھا کہ کیا آپ یہ چاہتے کہ محسن نقوی کو چیئرمین بورڈ کے عہدے سے فارغ کرکے آپ کو چیئرمین بورڈ بنا دیا جائے؟
صحافی کے سوال کا جواب دیتے ہوئے چاہت فتح علی خان نے کہا کہ ایسی بات نہیں ہے بلکہ میں چاہتا ہوں کہ محسن نقوی صاحب ایک بار میری پیشکش کے بارے میں سوچیں۔
اُنہوں نے کہا کہ میں نے فرسٹ کلاس کرکٹ کھیلی ہے، میرے پاس کرکٹ کا تجربہ ہے اور کرکٹ میرا پہلا پیار ہے،ہمارے کھلاڑیوں کو ذہنی طور پر مضبوط ہونے کی ضرورت ہے، میں قومی ٹیم کو ذہنی اور دلی طور پر مضبوط بناؤں گا۔