ایک نیوز: پاکستانی خواتین کرکٹ ٹیم کے مصروف شیڈول کا اعلان کر دیا گیا ہے۔
رپورٹ کے مطابق جنوبی افریقہ کی خواتین کرکٹ ٹیم اس سال اگست ستمبر میں پہلی مرتبہ پاکستان کا دورہ کرے گی ۔ جنوبی افریقی ٹیم کے اس دورے سے پاکستانی خواتین کرکٹ ٹیم کے 24-2023 ء سیزن کا باقاعدہ آغاز ہوگا۔
جنوبی افریقہ کی خواتین کرکٹ ٹیم اس دورے میں تین ٹی ٹوئنٹی انٹرنیشنل اور آئی سی سی ویمنز چیمپئن شپ25-2023 کے سلسلے کے تین ون ڈے انٹرنیشنل میچز کھیلے گی۔کراچی میں یہ میچز یکم سے 14 ستمبر تک کھیلے جائیں گے۔
پاکستان تین سیریز میں 9 ون ڈے انٹرنیشنل میچز کھیل کر 5 فتوحات کے ساتھ پوائنٹس ٹیبل پر دوسرے نمبر پر ہے جبکہ جنوبی افریقہ نے تین ون ڈے انٹرنیشنل میچوں کی ایک سیریز کھیلی ہے اور اس کے 6 پوائنٹس ہیں۔
16-2014 کی پہلی آئی سی سی ویمنز چیمپئن شپ میں پاکستان نے جنوبی افریقہ کے خلاف شارجہ میں سیریز کھیلی تھی جو جنوبی افریقہ نے دو ایک سے جیتی تھی جبکہ 20-2017 کی چیمپئن شپ میں پاکستانی ٹیم نے جنوبی افریقہ کا دورہ کیا تھا وہ سیریز ایک ایک سے برابر رہی تھی سیریز کا تیسرا ون ڈے انٹرنیشنل بینونی میں ٹائی ہوگیا تھا۔
حالیہ سالوں میں جو بڑی ٹیمیں پاکستان آئی ہیں ان میں جنوبی افریقہ چوتھی بڑی ٹیم ہوگی ۔ 2019ء میں ویسٹ انڈیز کی خواتین کرکٹ ٹیم نے کراچی میں تین ٹی ٹوئنٹی انٹرنیشنل کھیلے تھے۔ 2022ء میں سری لنکا اور آئرلینڈ کی ٹیمیں کراچی اور لاہور میں ون ڈے انٹرنیشنل اور ٹی ٹوئنٹی انٹرنیشنل کھیلی تھیں۔ اس کے علاوہ سات ممالک کی کرکٹرز نےخواتین لیگ کے تین نمائشی میچوں میں حصہ لیا تھا۔
جنوبی افریقہ کی خواتین ٹیم کے خلاف سیریز آئی سی سی ویمنز چیمپئن شپ کی ان پانچ سیریز میں ایک ہے جو پاکستانی ٹیم24-2023 کے سیزن میں کھیلے گی۔ اکتوبر میں پاکستانی خواتین کرکٹ ٹیم بنگلا دیش کا دورہ کرے گی۔ نومبر میں قومی ٹیم نیوزی لینڈ کے دورے پر ہوگی جبکہ مئی 2024ء میں قومی ویمن ٹیم کو انگلینڈ کا دورہ کرنا ہے۔پاکستان اپریل 2024ء میں ویسٹ انڈیز کی ٹیم کی میزبانی کرے گا۔
پاکستانی خواتین ٹیم ایک سال کے دوران آئی سی سی چیمپئن شپ کے پندرہ ون ڈے انٹرنیشنل اور سترہ ٹی ٹوئنٹی انٹرنیشنل میچز کھیلے گی۔ ٹی ٹوئنٹی انٹرنیشنل میچوں کی تعداد میں اضافہ بھی ہوسکتا ہے کیونکہ امکان ہے کہ پاکستانی ٹیم ستمبر میں چین کے شہر ہانگ ژو میں ہونے والے ایشین گیمز میں بھی حصہ لے۔پاکستانی خواتین کرکٹ ٹیم نے 2010میں گوانگ ژو اور 2014میں انچیون میں منعقدہ ایشین گیمز میں گولڈ میڈل جیتا تھا۔
پاکستان کرکٹ بورڈ ویمنز ونگ نے مستقبل کو مدنظر رکھتے ہوئے نئے ٹیلنٹ کو سامنے لانے کی غرض سے اکتوبر میں ویسٹ انڈیزایمرجنگ ٹیم اور بنگلا دیش ایمرجنگ کے خلاف جنوری میں دو ایمرجنگ سیریز بھی شیڈول کی ہیں۔ویسٹ انڈیز ایمرجنگ کے خلاف پاکستان تین ون ڈے اور تین ٹی ٹوئنٹی میچز کھیلے گی جبکہ بنگلہ دیش کے دورے میں پاکستان انڈر 19 ٹیم پانچ ٹی ٹوئنٹی میچ کھیلے گی۔
جنوبی افریقہ کے خلاف ہونے والی سیریز ندا ڈار کی بحیثیت کپتان پہلی سیریز ہوگی۔ندا ڈار اب تک 99 ون ڈے انٹرنیشنل اور130 ٹی ٹوئنٹی انٹرنیشنل میچوں میں پاکستان کی نمائندگی کرچکی ہیں۔
ندا ڈار کا کہنا ہے کہ پاکستانی ویمنز ٹیم کے لیے اگلا ایک سال بہت مصروف ہیں اور وہ آنے والے میچوں کے سلسلے میں بہت پرجوش ہیں۔ان میچوں سے کھلاڑیوں کو قیمتی تجربہ حاصل ہوگا اور ایکسپوژر ملے گا۔
ندا ڈار کا کہنا ہےکہ جنوبی افریقہ کے خلاف سیریز بحیثیت کپتان ان کی پہلی سیریز ہوگی جسے وہ نہ صرف اپنے ون ڈے میچوں کی سنچری مکمل کرکے یادگار بنانا چاہتی ہیں بلکہ وہ آئی سی سی چیمپئن شپ میں قیمتی پوائنٹس بھی حاصل کرنا چاہتی ہیں تاکہ پاکستانی ٹیم اوپر کی پوزیشن پر اختتام کرسکے۔
پاکستانی خواتین کرکٹ ٹیم کا آئی سی سی ویمنز چیمپئن شپ کا شیڈول جاری ہو گیا ہے جس میں قومی ٹیم جنوبی افریقہ کیخلاف 6 میچز کراچی میں کھیلے گی۔ 27 اگست کو جنوبی افریقی ٹیم پاکستان آئے گی۔یکم ستمبر کو پہلا ٹی ٹوئنٹی انٹرنیشنل،تین ستمبر دوسرا ٹی ٹوئنٹی انٹرنیشنل اور پانچ ستمبر کو تیسرا ٹی ٹوئنٹی انٹرنیشنل میچ کھیلا جائے گا۔ جس کے قومی ٹیم 3 ون ڈے میچز بھی کھیلے گی جس کا پہلا ون ڈے 8 اکتوبر کو کھیلا جائے گا۔ 11ستمبر کو دوسرا ون ڈے اور 14ستمبر تیسرا ون ڈے انٹرنیشنل کھیلا جائے گا۔
اکتوبر-نومبر میں پاکستانی ٹیم بنگلہ دیش کا دورہ کرے گی جس میں تین ون ڈے انٹرنیشنل تین ٹی ٹوئنٹی انٹرنیشنل کھیلے جائیں گے۔نومبر،دسمبر میں پاکستانی ٹیم نیوزی لینڈ کا دورہ کرے گی جس میں تین ون ڈے انٹرنیشنل اور تین ٹوئنٹی انٹرنیشنل شامل ہیں۔
اپریل-مئی 2024 میں قومی ٹیم ویسٹ انڈیز کا دورہ کرے گی جس میں تین ون ڈے انٹرنیشنل اور پانچ ٹی ٹوئنٹی انٹرنیشنل شامل ہیں۔ اس کے فوری بعد مئی 2024 میں پاکستانی ٹیم انگلینڈ کا دورہ کرے گی جس میں تین ون ڈے انٹرنیشنل اور تین ٹوئنٹی انٹرنیشنل شامل ہیں۔
اس کے علاوہ اضافی سیریز میں ستمبر2023 ایشین گیمز،اکتوبر،نومبر 2023 میں ویسٹ انڈیز ایمرجنگ ٹیم کا دورہ پاکستان،جنوری 2024 میں پاکستان انڈر19 ٹیم کا دورۂ بنگلہ دیش شامل ہے۔