ایک نیوز: امیر جماعت اسلامی پاکستان سراج الحق نے کہا ہے کہ کراچی کے عوام کو تنہا نہیں چھوڑیں گے،کراچی جاگ رہا ہے اور اپنی اصل کی طرف لوٹ رہا ہے۔
سراج الحق کا صحافیوں سے گفتگو میں کہنا تھا کہ بلدیاتی الیکشن میں جماعت اسلامی کی شاندار انتخابی کامیابی کراچی کی خوشحالی کا آغاز ثابت ہوگی۔ کراچی میں خدمت کی نئی مثالیں قائم کریں گے، جماعت اسلامی کراچی کی محرومیوں کا ازالہ کرے گی۔
واضح رہے کہ امیر جماعت اسلامی کراچی حافظ نعیم الرحمان نے کہا ہے کہ فارم 11 فراہم نہیں کیا جا رہا ہے، سندھ حکومت، الیکشن کمیشن کو وارننگ دیتا ہوں اگر نیتجہ نہ دیا تو شہر بند کر دیں گے۔کراچی اور حیدرآباد کے عوام کو بہت بہت مبارک ہو، تمام سازشوں کے باوجود بلدیاتی انتخابات کا انعقاد ہوا، سازشی عناصر نے مقابلہ کرنے کے بجائے میدان چھوڑ دیا۔ ٹرن آؤٹ 25 فیصد سے آگے چلا گیا، اگر ایک ہفتہ ملتا تو یہ 50 فیصد پر چلا جاتا، جماعت اسلامی ایک بار پھر ابھر کر سامنے آئی ہے۔ ن لیگ کبھی بھی بلدیاتی انتخابات کروانا نہیں چاہتی تھی، ہم نے کہا تھا کہ ہم تمہیں الیکشن سے بھاگنے نہیں دیں گے۔