ایک نیوز نیوز: ترجمان پاک فضائیہ کی جانب سے جاری کردہ بیان کے مطابق امریکی سفیر ڈونلڈ بلوم نے سربراہ پاک فضائیہ ائیر چیف مارشل ظہیر احمد بابر سدھو سے ملاقات کی۔ جس میں علاقائی سلامتی کی صورتحال اور دوطرفہ دفاعی تعاون بڑھانے پر تبادلہ خیال کیا گیا۔
اس موقع پر امریکی سفیر ڈونلڈ بلوم کا کہنا تھا کہ حالیہ برسوں کے دوران پاک فضائیہ کی خود انحصاری کے میدان میں غیر معمولی ترقی قابلِ تعریف ہے۔ علاقائی امن کے فروغ کے لئے پاکستان کی کوششیں قابل تعریف ہیں۔
ترجمان پاک فضائیہ کے بیان کے مطابق امریکی سفیر نے پاکستان کے ساتھ مختلف شعبوں میں تعاون بڑھانے کے عزم کا اعادہ کیا۔ اس موقع پر سربراہ پاک فضائیہ ایئرچیف مارشل ظہیر احمد بابر سدھو کا کہنا تھا کہ دونوں ممالک کے درمیان خوشگوار تعلقات قائم ہیں۔ پاکستان امریکہ کے ساتھ مضبوط سفارتی، اقتصادی اور دفاعی تعلقات کو قدر کی نگاہ سے دیکھتا ہے۔ ترجمان پاک فضائیہ کے مطابق دونوں فریقین نے تربیت اور آپریشنل شعبوں میں فوجی تعلقات کو مزید بہتر بنانے پر اتفاق کیا۔