جس نے 6 ماہ قبل پاکستان کو عالمی نمبر ون بنایا، لوگ اس بابر پر تنقید کررہے ہیں، کپل دیو

ویب ڈیسک :بھارتی کرکٹ ٹیم کے سابق کپتان اور لیجنڈری بلے باز کپل دیو نے کہا کہ جس نے 6 ماہ پہلے پاکستانی ٹیم کو عالمی نمبر ون بنایا، آج لوگ اس بابر اعظم کو تنقید کا نشانہ بنارہے ہیں۔
ایک  انٹرویو کے دوران ایک سوال کے جواب میں انہوں نے بابر اعظم کی کپتانی سے متعلق اظہار خیال کیا۔ انہوں نے کہا کہ لوگ بابر کو آج دیکھ رہے ہیں کیونکہ آج اس کی کارکردگی اچھی نہیں رہی لیکن وہ کل بھول گئے جب وہ پرفارم کرتا رہا ہے۔
کپل دیو کا کہنا تھا کہ جب کوئی زیرو بناتا ہے تو 99 فیصد لوگ کہیں گے کہ اس کھلاڑی کو ڈراپ کردو۔ دوسری طرف اگر کوئی عام کھلاڑی آکر 100 بنادیتا ہے تو سب کہتے ہیں کہ یہی سُپر سٹار ہے۔سابق بھارتی کرکٹر نے کہا کہ کسی کھلاڑی کو اس کی موجودہ کارکردگی کی بنا پر نہیں جانچیں۔ یہ دیکھیں کہ وہ کھیلتا کیسے ہے، اس میں کتنا جنون اور ٹیلنٹ ہے۔ کھلاڑی پہلی گیند پر بھی آؤٹ ہوسکتا ہے، دنیا میں کوئی ایسا بلے باز نہیں جو پہلی گیند پر آؤٹ نہ ہوسکے۔
انہوں نے کہا کہ ٹیم کی موجودہ کارکردگی کی وجہ سے لوگ بابراعظم کو طعنے دے رہے ہیں، ان پر تنقید کررہے ہیں۔ یاد رکھیں کہ یہ وہی کھلاڑی ہے جس نے 6 ماہ قبل پاکستان کو پہلے نمبر پر پہنچایا تھا۔