ایک نیوز: ایشیا کپ کی میزبانی کیلیے انگلینڈ کا نام سامنے آگیا ہے جس کا ایشین کرکٹ کونسل کی جانب سے آج فیصلہ متوقع ہے۔
رپورٹ کے مطابق ایشیا کپ کے پاکستان میں انعقاد کے حوالے سے حتمی فیصلہ آج متوقع ہے۔ ایونٹ کی میزبانی پاکستان کو دی گئی تھی لیکن جب ایونٹ کا وقت قریب آیا تو بھارت نے نہ صرف اپنی ٹیم پاکستان بھیجنے سے انکار کردیا بلکہ خود ہی ایشیائی ایونٹ کو کسی دوسرے ملک میں منعقد کرنے کا اعلان بھی کردیا۔
پی سی بی انتظامی کمیٹی کے سربراہ نجم سیٹھی نے میزبانی بچانے کیلیے ہائبرڈ ماڈل پیش کیا جس کے تحت باقی تمام ٹیموں کے مقابلے پاکستان جبکہ بھارت کے میچز یواے ای میں منعقد کیے جانے تھے۔ بی سی سی آئی نے اس تجویز کو رد کردیا جس پر ایک اور تجویز دی گئی جس میں ابتدائی چند میچز پاکستان اور باقی یو اے ای منتقل کرنے کی تجویز دی گئی۔
نجم سیٹھی نے ایشیا کپ کو انگلینڈ میں منعقد کرنے کی تجویز دے دی ہے۔ نجم سیٹھی کا کہنا ہے کہ ایشیا کپ کا انعقاد انگلینڈ میں بھی ہوسکتا ہے، ہم کیونکہ اس ٹورنامنٹ کے میزبان ہیں اس لیے متبادل کے طور پر کسی بھی وینیو کا انتخاب کرسکتے ہیں۔
ایشین کرکٹ کونسل کی جانب سے پاکستان میں ایشیائی شوپیس ایونٹ کے انعقاد کے حوالے سے فیصلہ آج متوقع ہے، بھارت پہلے ہی سری لنکا کو ایونٹ کی میزبانی کے خواب دکھا چکا اور اس کی جانب سے بھی واضح کیا جاچکا ہے کہ اگر پاکستان نہیں کھیلا تو اس کے بغیر ہی سری لنکا میں 5 ملکی ٹورنامنٹ منعقد کریں گے۔