پاکستان اور جنوبی افریقہ کا آخری ٹی 20 بارش کے باعث منسوخ

ویب ڈیسک: پاکستان اور جنوبی افریقہ کے درمیان سیریز کا تیسرا اور آخری ٹی 20 میچ بارش کے باعث منسوخ کردیا گیا۔
جوہانسبرگ میں میچ کا ٹاس بھی خاصی تاخیر کا شکار ہوا، بعد میں حکام نے مسلسل بارش کے باعث میچ منسوخ کرنے کا اعلان کردیا ، اس طرح 3 میچوں پر مشتمل سیریز جنوبی افریقہ نے 0-2 سے جیت لی۔
قبل ازیں جنوبی افریقہ کے خلاف تیسرے ٹی 20 میچ کے لیے پاکستان کی پلینگ الیون میں ایک تبدیلی کی گئی، عثمان خان کی جگہ پر سلمان علی آغا کو ٹیم کا حصہ بنایا گیا تھا۔
ٹیم کے کپتان محمد رضوان جبکہ دیگر کھلاڑیوں میں بابر اعظم، صائم ایوب، طیب طاہر، عرفان خان، سلمان علی آغا، عباس آفریدی، شاہین آفریدی، جہاندادخان، حارث رؤف اور ابرار احمد شامل تھے۔
واضح رہے کہ ٹی 20 سیریز کے پہلے میچ میں جنوبی افریقہ نے 11 رنز ، جبکہ دوسرے میچ میں ہوم ٹیم نے 7 وکٹوں سے فتح حاصل کی تھی۔