ایک نیوز: نوشہرہ میں پاک فوج کے زیر انتظام چلنے والے ہوپ سپیشل چلڈرن سکول میں سپیشل افراد کے عالمی دن کی مناسبت سے رنگا رنگ تقریب کا اہتمام کیا گیا۔
بچوں نے خوبصورت انداز نعت اور قومی ترانے سمیت مختلف خاکوں کی مدد سے وطن عزیز سے محبت اور گانوں پر پرفارمنس پیش کیا۔ اس کے علاوہ بچوں نے سبز ہلالی پرچم تھامے پاک فوج سے محبت کا انوکھا اظہار کیا۔
تقریب میں بچوں کے والدین اور اساتذہ نے شرکت کی۔ شرکاء نے بچوں کی بھرپور حوصلہ افزائی کی اور کہا کہ آج کے اس رنگا رنگ پروگرام میں بچوں کے مختلف ایونٹس دیکھ کر محسوس ہی نہیں ہوا کہ ہمارے بچے کسی جسمانی محرومی کا شکار ہیں۔
نوشہرہ میں سپیشل بچوں کیلئے پاک فوج کے تعاون سے ہوپ سپیشل چلڈرن سکول کا قیام 2012 میں عمل میں لایا گیا۔ ہوپ سپیشل چلڈرن سکول نوشہرہ میں بچوں کی تربیت کیلئے تربیت یافتہ (ماہر) سٹاف ہے جن کو مختلف قسم کے نیشنل اور انٹرنیشنل کورسز کروائے جاتے ہیں تاکہ دور جدید کے تقاضوں کو مدنظر رکھتے ہوئے بچوں کو تربیت فراہم کی جاۓ۔
سکول میں بچوں کی ضروریات کے مطابق الگ الگ کلاسز ، لائبریری، انڈور اور آوٹ ڈور کھیلوں کا میدان، فیزیوتھیراپی روم ، سننے میں مدد دینے والے آلات اور میڈیکل روم، نفسیاتی کونسلنگ سمیت مکمل ائیر کنڈیشنڈ کلاس روم کی سہولیات موجود ہیں۔ مہمان خصوصی نے پروگرام کے اختتام پر بچوں میں انعامات تقسیم کیے۔