ایک نیوز نیوز: بھارت کی ریاست بنگال میں بی جے پی لیڈر شبھیندو ادھیکاری کے کمبل تقسیم پروگرام میں بھگدڑ مچ گئی۔ بھگدڑ کی زد میں آکر تین غریب خواتین ہلاک ہوگئیں۔ پانچ دیگر افراد زخمی ہوگئے ہیں۔ رپورٹ کے مطابق زخمیوں کو آسنسول ضلع کے اسپتال میں داخل کرایا گیا ہے۔
تفصیلات کے مطابق تقریب کےمہمان خصوصی شبھیندو ادھیکاری اپنی تقریر ختم کرکے تقریب کے مقام سے چلے گئے تھے۔ تقریب کا اہتمام آسنسول کے سابق میئر اور بی جے پی لیڈر جتیندر تیواری نے کیا تھا۔ آسنسول پولیس کے ذرائع کا کہنا ہے کہ بی جے پی نے اس تقریب کی کوئی اجازت نہیں لی تھی۔
ٹی ایم سی نے اس حادثے کے لیے حزب مخالف لیڈر کو ہی قصوروار ٹھہرایا ہے۔ پارٹی ترجمان کنال گھوش نے الزام لگاتے ہوئے کہا کہ پتہ چلا ہے بی جے پی نے پولیس کی اجازت کے بغیر اس غیر قانونی ریلی کا انعقاد کیا تھا۔ غریبوں کی زندگی کے ساتھ کھلواڑ کیا گیا ہے۔ گھوش نے مزید کہا کہ شبھیندو ادھیکاری کو اس حادثے کے لیے معافی مانگنی چاہیے۔