ایک نیوز: صوبائی کابینہ کے اجلاس میں ریکارڈ 91 -ایجنڈا پوائنٹ زیر بحث لائے گئے ۔
تفصیلات کے مطابق وزیراعلیٰ پنجاب مریم نوازشریف کی زیر صدارت صوبائی کابینہ 22واں اجلاس ہوا، جس میں ریکارڈ 91 -ایجنڈا پوائنٹ زیر بحث لائے گئے ۔
وزیر اعلیٰ پنجاب نے کاٹن کی پیداوار بڑھانے کے لئے ہنگامی اقدامات کی ہدایت کی اور موسمیاتی تبدیلیوں کی وجہ سے گنے کی پیداوار میں کمی کے ازالے کے لئے اقدامات کا حکم دیا۔
اجلاس میں پہلا پنجاب ہندو میرج ایکٹ،رجسٹریشن رولز 2024 ء کی منظوری دی گئی ، پنجاب بھر میں تمام وہیکلزکی رجسٹریشن مہم شروع کرنے کا فیصلہ سامنے آیا ، موٹر سائیکل کی سپیڈ کو 60کلو میٹر فی گھنٹہ تک محدود کرنے کا فیصلہ بھی کیا گیا ، 12ماہ کے بعدموٹر سائیکل کی انسپکشن اور سرٹیفکیشن کے لئے ترمیم کی منظوری د ی گئی۔
اجلاس میں پنجاب میں اپنی نوعیت کی پہلی”پنجاب آسان کاروبار فنانس“سکیم کی منظوری ، سی ایم پنجاب آسان کاروبار کارڈ کی بھی منظوری دی گئی۔
وزیر اعلیٰ مریم نوازشریف نے آسان کاروبار سکیم کے لئے مفت اراضی دینے کااعلان کردیا، 3کروڑ روپے تک بلا سود قرضے دینے کا فیصلہ ،وزیر اعلیٰ مریم نوازشریف نے پنجاب میں ایک لاکھ بزنس سٹارٹ اپ کا ہدف بھی مقرر کر دیا ،سٹارٹ اپ کے لئے بزنس پلان دینے کی ہدایت کردی، صوبہ بھر میں ای وہیکلز کے لئے چارجنگ سٹیشن قائم کرنے کا حکم دیتے ہوئے جامع الیکٹرک وہیکلز پالیسی طلب کر لی ۔
کابینہ کی جانب سے قذافی سٹیڈیم کا نام تبدیل کرنے کا فیصلہ مسترد کردیا گیا۔
وزیر اعلیٰ پنجاب اور صوبائی کابینہ نے ہونہار سکالر شپ کی کامیاب لانچنگ پر صوبائی وزیر ایجوکیشن رانا سکندر حیات کی خدمات کو سراہا، اس موقع پر مریم نواز نےکہا ہونہار سکالر شپ پر طلبہ کا رسپانس بہترین اور قابل تحسین ہے۔
لیپ ٹاپ کی تعداد 40ہزار سے بڑھانے کی ہدایت کرتے ہوئے انہوں نے کہا میرٹ پر آنے والے ہر طالب علم کو لیپ ٹاپ دینا چاہتی ہوں، سیکنڈ ایئر اور تھرڈ ایئر کے طلبہ کو بھی ہونہار سکالر شپ دینے کے لئے فوری اقدامات کی ہدایت بھی کردی۔
کسان کارڈ کی تعداد 5 لاکھ سے ساڑھے 7 لاکھ کرنے اور کیش کی لمٹ30 فیصد تک بڑھانے کی منظوری دیتے ہوئے کہا کسان کارڈ سے کاشتکاروں نے 46ارب روپے کی خریداری کا ریکارڈ قائم کر دیا ، کسان رل گیا کا بیانیہ پٹ گیا، پنجاب کا کسان خوش اور خوشحال ہے، پنجاب بھر میں کاشتکاروں کو 9ہزار گرین ٹریکٹرز کی فراہمی مکمل ہے ،پنجاب چیف منسٹر سپیشل انشی ایٹو فار ڈائیلسزپروگرام کی منظوری ، ڈائیلسز کے لئے فنڈز 7 لاکھ سے بڑھا کر 10لاکھ کر دئیے گئے ۔
اوورسیز پاکستانیوں کے لئے جائیداد سے متعلق امور کے فیصلے کے لئے سپیشل عدالت قائم کرنے کی منظوری ، پنڈی گھیپ میں غیر ملکی ایکس پلورنگ کمپنی کو جعلی این او سی دینے پر کارروائی کی ہدایت اور 2019میں جعلی این او سی کرنے والوں کے خلاف کارروائی کا حکم دیدیا۔
وزیراعلی مریم نواز شریف کی ہدایت پر بلوچستان کے علاقے بارکھان کے شہری کی درخواست پرمالی امداد اور پبلک پرائیویٹ سیکٹر میڈیکل ڈینٹل کالجز کے سیشن2024-25 کی ایڈمیشن پالیسی کی منظوری دی گئی۔
وزیراعظم پاکستان کی ہدایت کے مطابق اسلام آباد کے لئے 30سیٹیں مختص کرنے کا فیصلہ کیا گیا، پنجاب میں سی پی اے ایشیا اور ساؤتھ ایسٹ ایشیا ریجنل کانفرنس کے انعقاد کے لئے ضمنی گرانٹ کی منظوری دی گئی، جرنلسٹ سپورٹ فنڈ کی سیڈ منی بڑھانے اور نادار صحافیوں کی مالی امداد کے لئے مختص رقم بڑھانے کی منظوری ، نوازشریف انسٹی ٹیوٹ آف کینسر ٹریٹمنٹ اینڈ ریسرچ ایکٹ 2024کی منظوری ، پراپرٹی ٹیکس،ویلیو ایشن سسٹم کو رینٹل ویلیو سے کپٹل ویلیو پر منتقل کرنے کی منظوری ، سپیشل ایجوکیشن میں ٹیکنیکل کیڈر کی 340آسامیاں پر بھرتی کی منظوری ، فاریسٹ سروسز اکیڈمی گھوڑا گلی اور پنجاب فاریسٹ سکول بہاولپور میں بھرتیوں کی منظوری بھی دی گئی۔