ایک نیوز: سائفر کیس کی اڈیالہ جیل میں سماعت کیلئے عمران خان اور شاہ محمود قریشی پر فرد جرم عائد کردی گئی ہے۔ دوران سماعت عمران خان نے کہا ہے کہ انہیں سزائے موت سے ڈرنہیں لگتا۔ یہ ڈرامہ صرف باجوہ اور ڈونلڈ لو کو بچانے کے لیے ہورہا ہے۔ باربار بولنے پر عدالت نے بانی چیئرمین پی ٹی آئی کو خاموش کروادیا۔
تفصیلات کے مطابق فرد جرم آفیشل سیکرٹ ایکٹ کی خصوصی عدالت کے جج ابوالحسنات ذوالقرنین نے پڑھ کر سنائی۔ شاہ محمود قریشی اور بانی چیئرمین پی ٹی آئی نے صحت جرم سے انکار کردیا ہے۔
ایف آئی کے اسپیشل پراسیکیوٹرز شاہ خاور اور ذوالفقار عباسی نقوی عدالت میں پیش ہوئے۔ چیئرمین پی ٹی آئی کے وکیل عثمان گل اور شاہ محمود قریشی کے وکیل بیرسٹر تیمور ملک عدالت میں پیش ہوئے۔
فرد جرم عائد ہونے کے بعد سائفر کیس کا باقائدہ ٹرائل اڈیالہ جیل میں شروع ہوجائے گا۔
سائفر کیس میں فرد جرم عائد کرتے ہوئے عدالت نے ریمارکس دیے کہ خفیہ سائفر کو جلسہ میں لہرایا گیا اور اس کے مندرجات کو زیربحث لایا گیا۔ ایسا کرنا آفیشل سیکرٹ ایکٹ کے تحت جرم ہے۔ بطور وزیراعظم عمران خان کو سائفر رکھنے کا کوئی اختیار نہ تھا۔ سائفر کو جان بوجھ کر اپنے مفاد کے لیے استعمال کیا گیا۔ اس عمل سے ملک کے تشخص اور قومی سلامتی کو نقصان پہنچا۔
اس دوران سابق وزیراعظم عمران خان نے کہا کہ جج صاحب اس میں ایک اور فقرہ شامل کردیں۔ بڑا ظلم کیا جو جنرل باجوہ اور ڈونلڈلو کو ایکسپوز کیا۔ باجوہ اور ڈونلڈ لو کو بچانے کے لیے تمام ڈرامہ ہورہا ہے۔
عمران خان نے عدالت کے روبرو اپنے بیان میں کہا کہ سزائے موت سے ڈر نہیں لگتا۔ سائفر حکومت گرانے کے لیے لکھا گیا جو گرا دی گئی۔ سائفر کے اندر سازش ہے جو چھپائی جارہی ہے۔ میڈیا کو بولنے کی اجازت نہیں تو فئیر ٹرائل کیسے ہوسکتا ہے۔ فئیر ٹرائل نہ ہوا تو اس کی ذمہ داری تمام عمر آپ پر رہے گی۔ قانون کے تحت دستاویزات اور ویڈیو دیکھنے کے لیے سات دن کا وقت دیا جائے۔
ملزمان پر فرد جرم تین مختلف الزامات کے تحت سنائی گئی:
چارج شیٹ کے مطابق عمران خان نےبطور وزیراعظم اور شاہ محمود قریشی نے بطور وزیر خارجہ سیکرٹ ایکٹ کی خلاف ورزی کی۔ ملزمان نے 27 مارچ 2022 کو سیکرٹ ڈاکومنٹ کو عوامی ریلی میں لہرایا۔ ملزمان نے جان بوجھ کر ذاتی مفادات کے لیے سائفر کو استعمال کیا۔
چارج شیٹ کے مطابق ملزمان کے غیر قانونی اقدام سے ملکی تشخص، سیکیورٹی اور خارجہ معاملات کو نقصان پہنچا۔ بطور وزیر اعظم سائفر آپکے قبضہ اور کنٹرول میں تھا،جو وزارت خارجہ کو واپس نہیں کیا گیا۔
فرد جرم سنتے ہی شاہ محمود قریشی نے صحت جرم سے انکار کردیا۔
عمران خان کا جج سے مکالمہ:
فرد جرم سنتے ہی سابق چئیرمین پی ٹی آئی نے جج سے مکالمہ کرتے ہوئے کہا کہ میں نے ملکی اور غیر ملکی اسٹیبلشمینٹ کو بے نقاب کرکے ظلم کیا میرے جرم میں یہ بھی شامل کریں۔ ہماری حکومت کو گرا کر ہمیں ہی ملزم بنادیا گیا۔ یہ کیسے ہوسکتا ہے جس کی حکومت گری ہو وہی ملزم ہو۔
عدالت نے ریمارکس دیے کہ آپ ایسا نہ کریں، غلط بات نہ کریں۔ یہ عدالت ہے، آپ کا لہجہ مناسب نہیں۔ آپ پہلے عدالت کی بات سن لیں۔
عمران خان کے بار بار بولنے پر عدالت نے انہیں خاموش کرادیا۔
شاہ محمود قریشی کا عدالت میں بیان:
شاہ محمود قریشی نے عدالت کے روبرو بیان دیا کہ سینکڑوں سائفر دیکھے لیکن یہ ان میں سے منفرد تھا۔ وزیر خارجہ کو دنیا بھر میں چیف ڈپلومیٹ کہا جاتا ہے۔ ایک مراسلہ آتا ہے جو چیف ڈپلومیٹ کی نظر سے نہیں گزارا جاتا۔ میری نظر سے سائفر اوجھل رکھنے کی کوئی تو وجہ ہوگی۔
انہوں نے بتایا کہ آٹھ مارچ کو فون پر اسد مجید سے بات ہوئی، اسد مجید کو بلائیے اور پوچھیے، پھر حقائق قوم کے سامنے آئیں گے۔ چیزوں کو خفیہ رکھ کر یک طرفہ ٹرائل نہ چلایا جائے۔
انہوں نے مزید کہا کہ دو محب وطن شہریوں کو اس مقدمہ میں پھنسایا جارہا ہے۔ میں بے گناہ ہوں، مجھے سزا دینا چاہتے ہیں۔ ہم نے اسی مٹی میں جانا ہے۔
کیس کی سماعت کل تک ملتوی کردی گئی۔