طلبہ خود کو ملک کی ترقی میں مثبت کردار ادا کرنے کے قابل بنائیں، آرمی چیف

ویب ڈیسک:آئی ایس پی آر کے مطابق آرمی چیف جنرل سید عاصم منیر نے نوجوان طلبہ پر زور دیا ہے کہ وہ پاکستانیت’ کو اپنائیں اور تعلیمی سرگرمیوں میں بہترین کارکردگی اور ایسی مہارتیں پیدا کریں جو ملکی ترقی میں مثبت کردار میں معاون ثابت ہو  ں۔  
پاک فوج کے شعبہ تعلقات عامہ (آئی ایس پی آر) کے مطابق آرمی چیف جنرل سید عاصم منیر نے پاکستان بھر سے یونیورسٹی اور کالج کے نوجوان طلبہ کے ایک نمائندہ گروپ سے خطاب کے دوران طلبا کی حوصلہ افزائی کرتے ہوئے زور دیا کہ طلبا اپنی تعلیمی سرگرمیوں میں بہترین کارکردگی کے حصول کے لے کوشش کریں اور ایسی مہارتیں پیدا کریں جو انہیں ملک کی ترقی میں مثبت کردار ادا کرنے کے قابل  بنائیں ۔
سپہ سالار نے پاکستان پر بیرونی خطرات بالخصوص سرحد پار دہشتگردی کے خطرات بارے بھی نقطہ نظر پیش کیا۔
آرمی چیف جنرل سید عاصم منیر نے نوجوانوں کی توانائی، تخلیقی اور تعمیری صلاحیتوں کو سراہتے ہوئے کہا کہ وہ پاکستان کی مستقبل کی قیادت ہیں۔
جنرل عاصم منیر نے ملک کی خود مختاری اور علاقائی سالمیت کے تحفظ میں پاک فوج کے کردار کو اجاگر کیا۔
سربراہ  پاک فوج نے دہشتگردی کی جنگ کے خلاف قومی جدوجہد میں عوام کی قربانیوں کو خراج تحسین پیش کیا اور مسلح افواج اور قانون نافذ کرنے والے اداروں کے عزم کو بھی سراہا۔
آرمی چیف جنرل سید عاصم منیر نے طلبہ پر ’پاکستانیت‘ کو اپنانے کی ضرورت پر زور دیا اور نوجوانوں کی فکری نشوونما میں پاکستان کی تاریخ، ثقافت اور اقدار کی اہمیت کو بھی اجاگر کیا۔