ایک نیوز: پاکستان کرکٹ ٹیم کاسکواڈ ٹی ٹونٹی سیریز کے پہلے میچ کے لیے پرتھ سے برسبین پہنچ گیا۔
پاکستان اور آسٹریلیا کے درمیان پہلا ٹی ٹونٹی میچ 14 نومبر کو برسبین میں ہوگا ، ٹی ٹونٹی سیریز کے لیے سکواڈ میں شامل کھلاڑی بھی پاکستان سے برسبین پہنچ چکے ہیں ۔
برسبین پہنچنے والوں میں عثمان خان ، عمیر بن یوسف ، صاحبزادہ فرحان ، سفیان مقیم ، عباس آفریدی اور جہانداد خان شامل ہیں ، ون ڈے سکواڈ کے چھ کھلاڑی آج رات پرتھ سے پاکستان روانہ ہونگے۔
پاکستان جانے والے کھلاڑیوں میں عبداللہ شفیق ، صائم ایوب ، کامران غلام، عامر جمال ، فیصل اکرم اور محمد حسنین شامل ہیں۔
خیال رہے کہ گزشتہ روز ون ڈے کے آخری میچ میں پاکستان نے 22سال بعدآسٹریلیاکو ون ڈے سیریز میں شکست دی تھی۔
پاکستان اور آسٹریلیا کے درمیان ایک روزہ سیریز کا فیصلہ کن میچ کھیلا گیا جہاں پاکستانی بولرز کی شاندار کارکردگی نے میزبان ٹیم کو 140 رنز پر ڈھیر کردیا، پاکستان اور آسٹریلیا کے مابین تیسرے میچ میں پاکستان نےٹاس جیت کر باولنگ کا فیصلہ کیا،آسٹریلیانے پاکستان کو جیت کیلئے 141رنز کا ہدف دیا تھا۔