ایک نیوز :مسلم لیگ ن کی سینئر نائب صدر اور چیف آرگنائزر مریم نواز نے عمران خان کی تقریر پر ردعمل دیتے ہوئے کہا کہ لاشوں کا منتظر گدھ کہلاتا ہے سیاستدان نہیں۔
عمران خان کے آڈیو لنک خطاب پر ردعمل دیتے ہوئے مریم نواز کا کہنا تھا جس کی سیاست لاشوں کی محتاج ہو جائے جان لو اس کا ہر حربہ ناکام ہو چکا ہے اور وہ جان گیا ہے کہ شکست اس کا مقدر بن چکی ہے۔
یاد رہے کہ اپنے ویڈیو لنک خطاب میں عمران خان نے مسلم لیگ ن کی چیف آرگنائزر کو تنقید کا نشانہ بناتے ہوئے کہا تھا کہ مریم نواز کی آڈیو سن لیں کیا کہہ رہی ہیں، مریم نواز کہتی ہے نواز شریف کے کیسز ختم کر دو، معاف کر دو، ہم اسی لیے دلدل میں پھنسے ہیں کہ قانون کی حکمرانی نہیں ہے۔
عمران خان کا کہنا تھا مریم نواز حکم دے رہی ہیں کہ اس کو جیل میں ڈال دو اور اس کو معاف کر دو، مریم نواز ہر جگہ عدلیہ کو برا بھلا بول رہی ہے اس پر توہین عدالت کیوں نہیں لگتی۔
ان کا کہنا تھا قتل کا پرچہ مجھ پر کیا اور آج پتا چلتا ہے کہ ظل شاہ کے ساتھ حادثہ ہوا، ظل شاہ جیسے بھلے مانس ملنگ کو ٹارچر کرکے قتل کیا گیا، کون سا ایسا حادثہ ہوتا ہے جو زخم ظل شاہ کو آئے ہیں۔