ایک نیوز:وزیراعلیٰ پنجاب مریم نواز کی جانب سے طلبہ میں ای بائیکس کی فراہمی کا باقاعدہ آغاز کردیا گیا ہے۔
وزیراعلیٰ پنجاب مریم نواز نے طلبہ میں ای بائیکس کی فراہمی کیلئے نجی ہوٹل میں منعقدہ تقریب میں بطور مہمان خصوصی شرکت کی، مریم نواز نے طلبہ میں ای بائیکس چابیاں تقسیم کیں۔
تقریب سے خطاب کرتے ہوئے وزیراعلیٰ پنجاب مریم نواز کا کہنا تھا کہ طلبہ سے بائیکس دینے کا وعدہ کیا تھا، آج طلبہ کو چابیاں دیتے ہوئے بہت خوشی ہوئی، طلبہ کو سہولت کیلئے ای بائیکس دینے کا وعدہ پورا کر دیا، بائیکس دینے پر مجھ سے زیادہ نوازشریف خوش ہیں۔
انہوں نے کہا کہ ٹرانسپورٹ وزیر سمیت سب کو شاباش دیتی ہوں، میرے ویژن پر 4 ماہ کے اندر عملدرآمد کرایا گیا، چاہتی ہوں پنجاب ای ٹرانسپورٹ کی طرف جائے، ای بائیک سکیم میں ڈاؤن پیمنٹ کی آدھی رقم حکومت پنجاب دے گی، ای بائیکس تمام اضلاع کے طلبہ میں تقسیم کی جائیں گی۔
مریم نواز کا کہنا تھا کہ آج ای بائیک سکیم کا آغاز ہے، جلد دوسرا فیز بھی شروع ہوگا، غریب اور نادار طلبہ کو تعلیم کی سہولت دینا حکومت کی ذمہ داری ہے، پنجاب میں پٹرول بائیکس کو آہستہ آہستہ ختم کر کے ای بائیکس کی طرف جائیں گے۔
وزیراعلیٰ پنجاب نے کہا کہ ای بائیکس کیلئے چارجنگ پوائنٹس بھی یقینی بنائیں گے، پنجاب ترقی سمیت ہرچیزمیں لیڈ کرے گا، چاہتی ہوں باقی صوبے بھی پنجاب کی تقلید کریں، یوتھ کیلئے مزید سکیمیں لا رہے ہیں، ماحول دوست بسیں بھی خریدنے جا رہے ہیں۔
انہوں نے طلبہ کو یاددہانی کرائی کہ باربار کہتی ہوں موٹربائیکس کو تیز نہیں آہستہ چلانا ہے، ہیلمٹ کے بغیر بائیک نہیں چلانی۔