ایک نیوز: جنوبی بھارت کی تامل انڈسٹری کی آنے والی فلم ’جیلر‘ کا گانا ’کاوالا‘ اداکارہ تمنا بھاٹیہ کے ڈانس کی وجہ سے خوب وائرل ہو رہا ہے۔
رپورٹ کے مطابق مداح جہاں تمنا بھاٹیہ کے ڈانس کی خوب تعریفیں کر رہے ہیں وہیں ایک مداح نے اِس گانے ’کاوالا‘ پر گلوکارہ شکیرا کے 2010 میں ریلیز ہونے والے مشہور زمانہ گانے ’واکا واکا‘ کو ایڈٹ کر دیا ہے۔سماجی رابطوں کی ویب سائٹ ٹوئٹر پر اپلوڈ ہونے والی ویڈیو میں دیکھا جا سکتا ہے تمنا بھاٹیہ کی ڈانس ویڈیو پر واکا واکا کو لگایا گیا ہے۔
جہاں اِس ویڈیو کو سوشل میڈیا پر لاکھوں افراد دیکھ چکے ہیں، وہیں اداکارہ تمنا بھاٹیہ نے بھی اپنی ٹویٹ میں اس ایڈٹ کی تعریف کی ہے۔اداکارہ نے اپنی ٹویٹ میں لکھا کہ ’ماننا پڑے گا کہ گانا اچھا سِنک ہوا ہے۔‘
’کاوالا‘ گانے کی ویڈیو کی بات کی جائے تو اِس میں اداکارہ تمنا بھاٹیہ کے ساتھ جنوبی بھارت کے سپرسٹار رجنی کانت بھی جلوہ گر ہیں۔
دوسری جانب سنیچر کو تمنا بھاٹیہ نے فوٹو اینڈ ویڈیو شیئرنگ پلیٹ فارم انسٹاگرام پر بھی اس گانے پر اپنے ڈانس کی ویڈیو اپلوڈ کی۔