سیف علی خان کا حملے کے باوجود سکیورٹی لینے سے انکار 

ویب ڈیسک:بالی وڈ اداکار سیف علی خان نے حملے کے باوجود سکیورٹی لینے سے انکار کردیا ہے۔
ڈکیتی کی واردات کے بعد بالی وڈ اداکار رونت رائے کی سکیورٹی ایجنسی کو سیف علی خان کے گھر کی سکیورٹی کی ذمہ داری دی گئی تھی جس کیلئے سی سی ٹی وی کیمرے بھی نصب کردیے گئے ہیں جبکہ سیف علی خان نے ذاتی سکیورٹی لینے سے منع کر دیا تھا۔
سیف علی خان نے بھارتی میڈیا سے گفتگو میں زیادہ سکیورٹی نہ رکھنے کی وجہ بتاتے ہوئے کہا ہے کہ میں کبھی بھی سکیورٹی پر یقین نہیں کرتا، میں کبھی بھی سکیورٹی گارڈز کے ساتھ نہیں چلنا چاہتا تھا، مجھے لگتا ہے کہ یہ میرے لیے ایک ڈراؤنا خواب ہوگا اور میں اب بھی نہیں چلوں گا کیونکہ مجھے نہیں لگتا کہ یہ مجھ پر حملہ ہے، کسی بھی خطرے میں نہیں ہوں، ہم میں سے کسی کو بھی کسی قسم کا خطرہ نہیں ہے، یہ ایک غلطی ہے جو ہوئی ہے۔
خیا ل رہے کہ گزشتہ ماہ ممبئی کے علاقے باندرہ میں سیف علی خان کے اپارٹمنٹ میں ڈکیتی کی واردات ہوئی تھی جسے اداکار نے مزاحمت کرتے ہوئے ناکام بنا دیا تھا تاہم اس دوران وہ زخمی بھی ہوئے تھے۔