پاکستان پہاڑوں کی حفاظت کیلئےکئی دہائیوں سے کام کر رہا :شہباز شریف

ایک نیوز: پہاڑوں کے عالمی دن پر وزیراعظم محمد شہباز شریف کا پیغام میں کہنا تھا کہ اللہ تعالیٰ نے ہمارے پیارے ملک کو درجنوں برف پوش اور سر سبز اونچی چوٹیوں سے نوازا ہے، ہماری یہ سرزمین دنیا کی سولہ بلند ترین پہاڑی چوٹیوں میں سے آٹھ چوٹیوں کا مسکن ہے۔
شہباز شریف نے کہا ہے کہ کے ٹوجو کہ دنیا کی دوسری بلند ترین چوٹی ، اور نانگا پربت، دنیا نویں بلند ترین چوٹی کے علاوہ 7,000 سے زیادہ گلیشیئرز، جو قطبی خطوں سے باہر برف کا سب سے بڑا ذخیرہ ہیں، پاکستان میں ہی واقع ہیں۔
وزیر اعظم کا کہنا تھا کہ پہاڑ، جنہیں اکثر دنیا کے "واٹر ٹاورز" کہا جاتا ہے، میٹھے پانی اور صاف ہوا جیسے ضروری وسائل کا ذریعہ ہیں، دنیا بھر کے پہاڑوں کو موسمیاتی تبدیلی، جنگلات کی کٹائی اور دیگر غیر پائیدار طرز عمل کے بڑھتے ہوئے چیلنجوں کا سامنا ہے،اس سال پہاڑوں کے عالمی دن کا موضوع " پہاڑوں کی پائیداری کے لیے حل جدت، موافقت، نوجوان اور مستقبل "، مشترکہ کوششوں، اختراع، مقامی دانش کے احترام اور پہاڑوں کے تحفظ کے لیے پائیدار حل تلاش کرنے میں نوجوانوں کی فعال شمولیت کی یاد دہانی ہے۔ 
انہوں نے کہا کہ پاکستان پہاڑوں کی حفاظت کے لیے کئی دہائیوں سے کام کر رہا ہے،اس سلسلے میں نیشنل ماؤنٹین کنزرویشن اسٹریٹجی سے لے کر ماحولیاتی سیاحت کے فروغ اور پائیدار ترقی کے اہداف پر توجہ مرکوز ہے، موسمیاتی تبدیلی کے جدید حل جیسا کہ ارلی وارننگ سسٹمز، زمین کے انحطاط کو روکنے کے لیے بائیو انجینئرنگ تکنیک، اور سیلاب سے بچاؤ کے لئے پائیدار تعمیرات کے ذریعے، ہم خیبر پختو نخوا اور گلگت بلتستان کے پہاڑی علاقوں میں محفوظ اور موسمیاتی تبدیلی سے مزاحم کمیونٹیز کی تعمیر کر رہے ہیں تاکہ ہماری کمیونٹیز محفوظ بھی رہیں اور ترقی بھی کریں۔