ایک نیوز: چیف جسٹس پاکستان نے ریمارکس دیے ہیں کہ کسٹم حکام خود گاڑیاں اسمگل کراکر پھر خود پکڑوا دیتے ہیں، یہ ٹرک کوئی ماچس کی ڈبیا نہیں کس راستے سے آیا کسٹم حکام کو پتہ ہی نہیں۔
تفصیلات کے مطابق سپریم کورٹ میں خیبر پختونخواہ کسٹم حکام کی جانب سے اسمگل ٹرک پکڑنے سے متعلق کیس کی سماعت ہوئی۔عدالت نے کسٹم کی اپیل خارج کرتے ہوئے کسٹم وکیل کی سرزنش کردی۔
چیف جسٹس قاضی فائز عیسٰی نے ریمارکس دیے کہ آپ عدالت میں نہ دلائل دے رہے ہیں نہ ہی قانون کی بات کر رہے ہیں، کسٹم حکام کے علم میں آئے بغیر پشاور بارڈر سے 400کلو میٹر اندر گاڑی پکڑی گئی، کسٹم حکام پہلے خود پیسے لیکر گاڑیاں اسمگلنگ کراتے ہیں اور بعد میں خود ہی پکڑوا دیتے ہیں۔
چیف جسٹس نے ریمارکس دیئے کہ کسٹم ڈیپارٹمنٹ کیخلاف انکوائری کیوں نہ کی جائے، ٹرک 1996 میں مینوفیکچر ہوا اور 2016 میں پکڑا گیا۔22 سال تک کہاں چلتا رہا، اسمگلنگ کہاں سے ہوتی ہے یہ ٹرک کوئی ماچس کی ڈبی نہیں کس راستے سے آیا کسٹم حکام کو پتہ ہی نہیں، پشاور میں جاکر دیکھیں کیسے گاڑیاں اسمگل ہوتی ہیں، کیوں نہ کلکٹر کسٹم کو بلا لیں پاکستان میں یہ کیا چیزیں ہورہی ہیں، کسٹم حکام نے غیر ضروری مقدمہ بازی کی اور معاملہ سپریم کورٹ پہنچا پھر عدالتوں کا وقت ضائع کیا، ایسے غیر ضروری مقدمات کی وجہ سے عدالتوں میں اصل مقدمات نہیں سنے جاسکتے ہیں، آئندہ کسٹم حکام ایسے غیر ضروری مقدمات دائر کرنے سے اجتناب کریں۔
جسٹس اطہر من اللہ نے ریمارکس دیئے کہ گاڑیاں اسمگل ہوتی ہیں تو مکمل ٹیمپرینگ کی جاتی ہیں مگر اس ٹرک کا تو چیچز نمبر ٹیمپر ہی نہیں ہوا۔ 2008 میں کسٹم حکام نے پشاور سے ٹرک ماڈل 1996 پکڑا تھا۔
چیف جسٹس قاضی فائز عیسٰی کی سربراہی میں تین رکنی بینچ نے کسٹم کی اپیل خارج کردی۔