ایک نیوز نیوز: ہمسایہ ملک بھارت کے معروف سیاستدان اور اتر پردیش کے سابق وزیر اعلیٰ ،سماج وادی پارٹی کے سرپرست ملائم سنگھ یادو 82 برس کی عمر میں انتقال کرگئے ۔
رپورٹ کے مطابق ملائم سنگھ یادو نے 10 اکتوبر صبح 8:16 بجے گروگرام کے میڈانتا اسپتال میں آخری سانسیں لیں جہاں وہ کچھ عرصے سے زیرعلاج تھے۔ ملائم سنگھ کی موت کے بعد سماج وادی خاندان میں غم کی لہر دوڑ گئی ہے۔ ایس پی کے قومی صدر اکھلیش یادو نے سماجی رابطے کی سائٹ پر ایک ٹویٹ میں کہا کہ میرے قابل احترام والد اور سب کے لیڈر اب نہیں رہے۔
اتر پردیش کے وزیراعلی یوگی آدتیہ ناتھ نے ملائم یادو کے انتقال پر ریاست میں تین دن کے سرکاری سوگ اور ان کی آخری رسومات پورے سرکاری اعزاز کے ساتھ ادا کیےجانے کا اعلان کیا ہے۔
55 سال سے زیادہ سیاست میں سرگرم رہنے والے ملائم سنگھ یادو 22 نومبر 1939 کو اٹاوہ ضلع کے سیفئی میں پیدا ہوئے۔ وہ 1967 میں یوپی کے جسونت نگر سے ایم ایل اے منتخب ہونے کے بعد پہلی بار اسمبلی پہنچے اور پھر انہوں نے اپنے سیاسی کیریئر میں کبھی پیچھے مڑ کر نہیں دیکھا۔ وہ آٹھ بار ایم ایل اے منتخب ہوئے تو وہیں سات بار لوک سبھا ممبر بنے۔
1977 میں وہ جنتا پارٹی سے پہلی بار یوپی کے وزیر بنے، جب کہ 1989 میں وہ پہلی بار یوپی کے سی ایم بنے۔ اس کے بعد 1993 اور پھر 2003 میں دوسری اور تیسری مرتبہ وزیراعلیٰ کے عہدے پر فائز ہوئے۔ ملائم سنگھ یادو نے 1992 میں سماج وادی پارٹی کی بنیاد رکھی اور 1993 میں بی ایس پی کے ساتھ مل کر حکومت بنائی۔