ہاکی فیڈریشن کادوسری آرمی چیف ہاکی چیمپئن شپ کرانے کا اعلان

ایک نیوز(چودھری اشرف)پاکستان ہاکی فیڈریشن نے قومی کھیل کے فروغ کے لیے دوسری چیف آف آرمی سٹاف انٹر کلب ہاکی چیمپئن شپ کرانے کا اعلان کردیا۔
نیشنل ہاکی سٹیڈیم کے لان میں سیکرٹری پی ایچ ایف رانا مجاہد نے پریس کانفرنس میں چیمپئن شپ کی تفصیلات بتائیں۔ 
ان کا کہنا تھا کہ ہم چیف آف آرمی سٹاف جنرل سید عاصم منیر نشان امتیاز ملٹری کے قومی کھیل کی سرپر ستی کرنے پر شکر گزار ہیں، دوسری چیف آف آرمی سٹاف انٹر کلب ہاکی چیمپئن شپ میں پاکستان بھر سے آٹھ سو کلبز حصہ لیں گے۔
کلبز کی رجسٹریشن کا عمل منگل سے شروع ہوکر پندرہ دسمبر تک جاری رہے گاجس کےبعد تمام صوبائی ہاکی ایسوسی ایشنز تین دن کی جانچ پڑتال کریں گی،ڈسٹرکٹ کلبز مقابلوں کا پہلا مرحلہ بیس دسمبر سے شروع ہوگا۔
اس کے بعد ریجنل،صوبائی سطح پر میچز کھیلے جائیں گے، قومی سطح پر آخری مرحلے کا آغاز تین فروری سے ہوگا، فائنل پندرہ فروری کو کھیلا جائے گا۔
  چیمپئن شپ کو انتہائی پیشہ وارانہ انداز میں منظم کیا جائے گا جس کا مقصد نوجوان اور باصلاحیت ہاکی کھلاڑیوں کی تلاش ہے،جو آگے چل کر قومی ٹیم کا حصہ بنیں گے،پریس کانفرنس میں اولمپئن آصف باجوہ، قومی ٹیم کے ہیڈ کوچ طاہر زمان اور اولمپئن انجم سیعد بھی موجود تھے۔