ایک نیوز: گزشتہ ہفتے گھر سے اسکول جاتے ہوئے بچوں کو اغوا کرنے میں ملوث ملزمان پولیس کے ساتھ مبینہ مقابلے میں ہلاک ہو گئے۔
تفصیلات کے مطابق تھانہ احمد پور لمہ اور تھانہ کوٹ سبزل پولیس کامسلح ملزمان سے فائرنگ کا تبادلہ ہوا جس میں 4 ملزمان ہلاک جب کہ 2 فرار ہونے میں کامیاب ہوگئے۔ پولیس ترجمان کا کہنا ہے کہ ناکا بندی پر موجود پولیس نے مشکوک کار کو روکنے کی کوشش کی جس میں ملزمان نے فرار ہونے کی کوشش میں ناکا توڑتے ہوئے رفتار بڑھا دی۔
پولیس پارٹی کے گھیراؤ اور تعاقب پر ملزمان نےکار چھوڑ کر پولیس پر فائرنگ کر دی۔ فائرنگ کے تبادلے کے دوران 4 ملزمان اپنے ساتھیوں کی فائرنگ سے ہلاک ہو گئے۔ فائرنگ رکنے پر پولیس کے سرچ آپریشن میں ملزمان کی شناخت عثمان، حسیب، جنید اور راحیل کے ناموں سے ہوئی۔ ہلاک ملزمان کی شناخت ان کی جیبوں میں برآمد شناختی کارڈز کی کاپیوں سے کی گئی ہے۔
پولیس کا کہنا ہے کہ ہلاک ملزمان نے کچھ دن قبل خان پور سے ڈاکٹر حسن کے بیٹوں شایان اور سبحان کے اغوا کیا تھا۔ ملزمان نے خان پور میں دن دیہاڑے اسکول جاتے ہوئے دونوں بچوں کو اسلحہ کے زور پر قتل کر دینے کی نیت سے اغوا کیا تھا۔ پولیس نے ملزمان کے زیر استعمال کار بھی قبضے میں لے لی جو اغوا کی واردات میں استعمال ہوئی تھی اور پولیس کو مطلوب تھی۔