وہ اہم پھل جوکولیسٹرول کوکنٹرول کرنےمیں کرداراداکرتےہیں

ایک نیوز: کچھ پھلوں اور سبزیوں کے استعمال سے ثابت ہوا ہے کہ وہ بلڈ پریشر اور امراضِ قلب کی وجہ بننے والے کولیسٹرول کو کم کرسکتےہیں۔ ان میں کئی پھل ہمارے اردگرد موجود ہیں۔
تفصیلات کےمطابق خون میں موجود مضر چکنائی یا کولیسٹرول ایک عالمی وبا کی صورت بن چکی ہے،پھل قدرتی اجزا، پولی فینول، ریشوں (فائبر) اور دیگر اہم معدنیات سے بھرپور ہوتے ہیں۔ فائبرکے ذرات آنتوں میں پہنچ کر ہی کولیسٹرول سے چپک جاتے ہیں اور اسے خون میں شامل ہونے سے روکتے ہیں۔ ان پھلوں کے نام یہ ہیں:
ایک سیب روزانہ
ماہرین کاکہناہےکہ سیب ڈاکٹر کو بھگانے کے ساتھ ساتھ کولیسٹرول کو دور رکھنے میں بھی معاون ثابت ہوتا ہے۔ سیب میں حل ہونے والا فائبر، وٹامن سی اور پوٹاشیئم پایا جاتا ہے۔ سرخ اور سبز رنگ والے سیبوں میں تمام ضروری اینٹی آکسیڈنٹس ہوتے ہیں جو دل کو توانا رکھتے ہیں۔ اس لیے ضروری ہے کہ صبح ناشتے میں سیب ضرور کھائیں کیونکہ اس طرح مفید اثرات پورے دن تک برقرار رہتے ہیں۔
بیریاں
اسٹربری، بلیوبیری، کرین بیری اور اس نسل سے تعلق رکھنے والے انگوروں کا استعمال کولیسٹرول گھٹانے میں اہم کردار ادا کرسکتا ہے۔ روزانہ ایک کپ بیریاں ضرور کھائیں کیونکہ ان میں اینٹی آکسیڈنٹس کی بھرپور مقدار پائی جاتی ہے۔ بلیک بیریاں بھی دیگربیریوں کی طرح دل کی حفاظت کرتی ہیں اور ان میں حل ہونے والے فائبر کی وسیع مقدار موجود ہوتی ہیں۔ رسبری اور اسٹرابری براہِ راست کولیسٹرول کم کرسکتی ہیں۔
موسمبی، نارنجی اور گریپ فروٹ
موسمبی، نارنجیاں، کینواورگریپ فروٹ کھٹے رسدار فروٹ کہلاتے ہیں۔ یہ وٹامن سی اور اینٹی آکسیڈنٹس سے مالامال ہوتے ہیں جو دل کی حفاظت کرتےہیں۔ ان پھلوں میں موجود حل پذیرفائبر کولیسٹرول کم کرتے ہیں جس کے سائنسی شواہد بھی مل چکےہیں۔
انگور
انگوروں میں حل پذیر فائبر اور اینٹی آکسیڈنٹس پائے جاتے ہیں جو کولیسٹرول کم کرنے میں بہت اہم کردار ادا کرتے ہیں۔ انگوروں میں ایک کیمیکل، ریسورٹرول بھی پایا جاتا ہے جو دل کو صحتمند رکھتا ہے۔
انار
انارانسانی صحت کیلئےبہت فائدہ مندپھل ہےکیونکہ اس کے بلڈ پریشرکو کنٹرول میں رکھنے اور دل کیلئے مفید ہونے کے مسلمہ ثبوت سامنے آچکے ہیں۔ حل شدہ فائبر اور اینٹی آکسیڈنٹس کی بدولت یہ طبی ٹانک سے کم نہیں۔
لیموں
لیموں پیاس بجھاتا ہے، نظامِ ہاضمہ کا دوست ہے اور وٹامن سی کا خزانہ بھی ہے۔ اس میں موجود قیمتی اجزا کولیسٹرول کم کرنے میں اہم کردار ادا کرتےہیں۔ یہاں تک کہ ایک لیموں میں40 ملی گرام تک وٹامن سی مل جاتا ہے۔ اس لیے لیموں کا استعمال ترک نہ کیجئے کیونکہ یہ خون کو پتلا رکھتے ہوئے بہاؤ کو بہتر بناتا ہے۔