ایک نیوز:امیر جماعت اسلامی حافظ نعیم الرحمان کا کہناہے پاکستان میں حکومت اور اپوزیشن امریکہ کی طرف دیکھتے ہیں ۔
تفصیلات کے مطابق حافظ نعیم الرحمان نے اپنی گفتگو میں کہا ہے امریکہ دنیا کاسب سے بڑا طاغوت ہے، جو امریکا کے ساتھ چلے گا وہ اسلام اور پاکستان کے خلاف چلے گا، ملک میں حکومت اور اپوزیشن امریکہ کی طرف دیکھتے ہیں، ہم واشنگٹن اور اس کے حواریوں کے خلاف جدوجہد کو دین کا تقاضا سمجھتے ہیں،امریکہ انسانیت اور جمہوریت کا دشمن ہے ، ٹرمپ نے عہدہ صدارت سنبھالنے سے قبل ہی حماس کو تیسری وارننگ جاری کردی ہے ، امریکہ فلسطینیوں کی نسل کشی میں ملوث اسرائیل کی مکمل پشت پناہی کررہا ہے، حماس کو فلسطینی عوام کی حمایت حاصل ہے ، مگر جمہوریت کے دعوے دار مغرب و امریکہ کو یہ جمہوریت قبول نہیں ہے۔
انہوں نے کہا حکومت نے چند مگرمچھوں کو بجلی نہ بنانے پر بھی دوہزار ارب دے دیئے ، قوم کو بنیادی ضروریات پر سبسڈی نہیں دی جاتی، آئی پی پیز معاہدے ختم کرنے سے خزانہ کو فائدہ ہوا، بجلی کے بلوں پر عوام کو فائدہ کیوں نہیں ہورہا، حکومت کو ہر صورت میں عوام کو ریلیف دینا ہو گا ، مہنگائی کم ہونے کے حکومتی دعووں کا زمینی حقائق سے کوئی تعلق نہیں ، حقیقت میں مہنگائی نے عام آدمی کی زندگی اجیرن بنا دی ہے ، فروری کے آخر تک پوری عوامی طاقت سے جدوجہد کا آغاز کریں گے۔