ایک نیوز:آئی سی سی کرکٹ ورلڈ کپ میں آج دو میچز کھیلے جائیں گے، پہلے میچ میں افغانستان کا مقابلہ بنگلادیش سے ہوگا ،دوسرے میچ میں جنوبی افریقا اور سری لنکا آمنے سامنے ہوں گے۔
تفصیلات کے مطابق دھرم شالہ میں آج کے پہلے میچ میں افغانستان کا مقابلہ بنگلادیش سے ہوگا، یہ میچ صبح 10بجے کھیلا جائے گا۔افغانستان کی ٹیم کو اچھے اسپنرز کے سبب بنگلادیش پر کچھ برتری حاصل ہے تاہم بنگلادیش کے بیٹر مہدی حسن میراز عمدہ فارم میں ہیں، ورلڈ کپ کے دونوں وارم اپ میچز میں اُنہوں نے نصف سنچریاں اسکور کی تھیں۔کپتان شکیب الحسن بھی چل گئے تو بنگلادیش کی جیتنے کی اُمیدیں بڑھ جائیں گی۔
افغان بیٹرز رحمان اللہ گرُباز اور ابراہیم زادران کا بھی اس میچ میں کردار اہم ہوگا، دونوں ٹیموں نے دو مرتبہ ورلڈ کپ مقابلوں میں ایک دوسرے کا سامنا کیا ہے، ان دونوں میچز میں بنگلادیش کامیاب رہا۔
کرکٹ ورلڈ کپ میں آج کے دن کا دوسرا میچ جنوبی افریقا اور سری لنکا کے درمیان نئی دلی میں کھیلا جائے گا۔نئی دلی کے گرم موسم میں جنوبی افریقا اور سری لنکا کے درمیان کھیلے جانے والے اس میچ میں جنوبی افریقا کی بیٹنگ کو سری لنکن اسپنرز کے چیلنجز کا سامنا ہوگا۔
دلی کا موسم سری لنکن ٹیم کے حق میں جا سکتا ہے تاہم سری لنکن ٹیم کی بیٹنگ پر سوالیہ نشان ہے جبکہ اُن کی باؤلنگ بھی مہیش تھکشانا کی غیر موجودگی میں کمزور دکھائی دے رہی ہے۔ جنوبی افریقا کی بیٹنگ اپنے جوبن پر ہے اور بھارت میں جس طرح کی پچز ہیں اُس پر اُن کے بیٹرز رنز کے انبار لگا سکتے ہیں البتہ باؤلنگ میں نورکیا اور سیساندا ماگالا کی غیر موجودگی سے فرق پڑے گا۔
ورلڈ کپ میں سری لنکا اور جنوبی افریقا کے درمیان 6مقابلے ہوئے ہیں جس میں سے 4جنوبی افریقا نے جیتے ہیں جبکہ 1میچ سری لنکا کے نام رہا ہے، ایک میچ ٹائی رہا۔