ایک نیوز: ملک میں ہفتہ وار بنیادوں پر مہنگائی بڑھنے کی شرح میں معمولی کمی، ایک ہفتے میں مہنگائی کی شرح میں 0.21 فیصد کمی ریکارڈ ،سالانہ بنیادوں پر مہنگائی بڑھنے کی شرح 1.02 فیصد رہی ،ادارہ شماریات نے مہنگائی پر ہفتہ وار رپورٹ جاری کر دی ۔
ادارہ شماریات کی جانب سے جاری کردہ رپورٹ کے مطابق گزشتہ ہفتے کے دوران 13 اشیا ضروریہ کی قیمتوں میں اضافہ ہوا، 16 اشیا ضروریہ کی قیمتوں میں کمی اور22 کی قیمتیں مستحکم رہیں۔
رپورٹ کے مطابق گزشتہ ہفتے کے دوران کیلے کی قیمت میں فی درجن 4.35 روپے اضافہ ہوا، ڈیزل فی لیٹر 6.99روپے مہنگا ہوا، چینی کی فی کلو قیمت 2.68روپے بڑھ گئی، لہسن کی قیمت میں 3 روپے فی کلو اضافہ ہوا، نمک، پیٹرول، سیگریٹ، کپڑا، خشک دودھ اور جلانے کی لکڑی بھی مہنگی ہونے والی اشیا میں شامل ہیں۔
رپورٹ کے مطابق گزشتہ ہفتے ٹماٹر کی فی کلو قیمت 7.94 روپے کم ہو گئی، آلو کی کلو قیمت 4.39 روپے کم ہوئی، پیاز کی قیمت میں 5.19روپے فی کلو کمی ہوئی، ایک ہفتے میں برائلر مرغی کا گوشت 17.57 روپے فی کلو سستا ہو گیا،دال چنا کی قیمت 5.93 روپے اور دال ماش کی قیمت 3.2 روپے کم ہو ئی، چاول،سرسوں کا تیل اور آٹا بھی سستی ہو نے والی اشیا میں شامل ہیں۔