ایک نیوز: نگراں وزیراعلٰی پنجاب محسن نقوی اپنے وفد کے ہمراہ تاشقند کے دورے پر ہیں، جہاں انہوں نے جدید کاٹن فیکٹری اور کاٹن فیلڈز کا دورہ کیا ہے، محسن نقوی نے کاٹن فیکٹری میں جدید مشینری کا معائنہ کیا اور کاٹن کی پراسیسنگ کاجائزہ لیا۔
وزیراعلٰی محسن نقوی نے کاٹن فیکٹری میں جدید ٹیکنالوجی کے استعمال کا مشاہدہ کرتے ہوئے جدید مشینری کے استعمال کے اقدام کوسراہا اور جدت سے لیس ٹیکنالوجی کی افادیت کے بارے میں ازبک حکام نے ان کو بریفنگ بھی دی۔
نگراں وزیر اعلٰی پنجاب محسن نقوی نے کہاکہ کوشش کریں گے اس طرح کی جدید کاٹن فیکٹریاں پنجاب میں بھی لگائی جائیں، اس ضمن میں ازبک حکومت کے ساتھ اشتراک کار بڑھایا جائے گا۔
وزیراعلیٰ محسن نقوی اور وفد نے کپاس کے کھیتوں کا بھی معائنہ کیا اور بہترین کپاس کی فصل پر ازبک کے زرعی ماہرین کی کاوشوں کی تعریف کی۔
انہوں نے کہاکہ کپاس کی زیادہ پیداوار کے حصول کے لیے ازبکستان کی مہارت اور تجربے سے استفادہ کیا جائے گا، ازبکستان پنجاب کی زراعت کو فائدہ پہنچانے کی صلاحیت رکھتا ہے اور یہ دورہ زرعی شعبہ میں تعاون کے لیے ایک سنگ میل کی حیثیت رکھتا ہے۔
ازبک حکام نے محسن نقوی کو بریفنگ دیتے ہوئے کہاکہ ازبکستان خطے میں کپاس پیدا کرنے والے سرفہرست ممالک میں سے ایک ہے اور ازبکستان میں کپاس کی فی ایکڑ اوسط پیداوار 700 سے 1800 کلوگرام ہے۔ ازبکستان کے موسمی حالات پنجاب کے موسمی حالات سے مطابقت بھی رکھتے ہیں۔
وزیر اعلٰی محسن نقوی کے ہمراہ ان کے وفد میں صوبائی وزراء ایس ایم تنویر، عامر میر، چیف سیکرٹری پنجاب، میجر جنرل شاہد، سیکرٹری زراعت پنجاب، اپٹما کے مرکزی رہنماء گوہر اعجاز، فواد مختار، شاہدستار، نصیر اللہ بھی موجود ہیں۔
نگران وزیراعلیٰ کی گورنربخارا سے ملاقات:
نگران وزیراعلیٰ پنجاب محسن نقوی اور گورنر بخارا بوتیرزریپوف (Mr. Botir Zaripov) کے درمیان اہم ملاقات ہوئی۔ جس میں بخارا اور ملتان کو سسٹر سٹیز قرار دینے کی تجویز پر تبادلہ خیال کیا گیا۔
اس موقع پر محسن نقوی نے کہنا تھا کہ بخارا اور ملتان کو سسٹر سٹیز قرار دینے سے صوفی ازم اور مذہبی ثقافت کو فروغ ملے گا- صوفی ازم ہمارا مشترکہ ورثہ ہے- پاکستان اور ازبکستان تاریخی، مذہبی اور ثقافتی رشتوں میں بندھے ہوئے ہیں۔ کپاس اور گندم کے بیج ڈویلپ کرنے کے حوالے سے ازبکستان کے تجربے سے استفادہ کریں گے-
محسن نقوی کا کہنا تھا کہ ازبکستان نے زرعی شعبے میں انقلابی اصلاحات کر کے اپنی معیشت کو مستحکم کیا ہے- پاکستان خصوصا پنجاب ازبکستان کے زرعی انقلاب کے اقدامات سے فائدہ اٹھائے گا- پنجاب اور ازبکستان کی مشترکہ کمیٹی زرعی تعاون کے لئے فوری اقدامات کرے گی- پاکستان اور ازبکستان کے درمیان سڑک کے ذریعے رسائی سے سیاحت کو فروغ ملے گا- ہم اپنی زرعی معیشت کو بحال کرنے کے لئے پرعزم ہیں-
گورنر بخارا نے وزیر اعلی پنجاب محسن نقوی اور ان کے وفد کا خیر مقدم کیا اور ہرممکن تعاون کی یقین دہانی کرائی۔ گورنر بخارا نے کہا کہ پنجاب حکومت کے ساتھ زراعت، سیڈ ڈویلپمنٹ اور دیگر شعبوں میں اشتراک بڑھائیں گے-