ٹک ٹاک پروائرل ون چپ چیلنج دوست کی جان لےگیا

ایک نیوز:ٹک ٹاک پر وائرل مصالحے دار چپس کھانے کا چیلنج 14 سالہ طالبعلم کی جان لے گیا۔
میڈیا رپورٹس کے مطابق امریکی ریاست میساچوسٹس کے ایک ہائی سکول میں گزشتہ جمعہ کو دسویں جماعت کا طالبعلم مبینہ طور پر ’ون چپ چیلنج‘ میں حصہ لینے کی وجہ سے انتقال کر گیا۔
ون چپ چیلنج ویڈیو شیئرنگ ایپ ٹک ٹاک پر ان دنوں کافی وائرل ہورہا ہے جس میں ’پاکوئی‘ نامی کمپنی کا مصالحے دار چپس کھانا ہوتا ہے۔
کمپنی لوگوں کو چیلنج کرتی ہے کہ وہ اس اسنیک کو کھانے کے بعد مرچوں کا اثر کم کرنے کیلئے کچھ بھی کھانے یا پینے سے خود کو روکے رکھیں تاکہ انکی برداشت کرنے کی صلاحیت کا امتحان لیا جاسکے۔
14 سالہ ہیرس کوسکول میں اسکے دوست نے یہ چیلنج کرنے کو کہا تھا جس پر اس نے مبینہ طور پر اپنے دوست کی جانب سے دیے گئے انتہائی مصالحے دار چپس کھالیے جس سے اسکے پیٹ میں درد شروع ہوگیا۔
نوجوان کی والدہ کے مطابق بیٹے کی طبیعت خراب ہونے پر انہیں سکول سے فون آیا تھا جس کے بعد وہ اسکو گھر پر لے آئے۔ ہیرس نے کچھ دیر بعد خود کو بہتر محسوس کرنا شروع کردیا تھا۔
والدہ کا کہنا تھا کہ وہ باسکٹ بال کھیلنے کیلئے باہر جانے کا ارادہ کر رہا تھا کہ اس دوران اسکی طبیعت پھر خراب ہوئی جس پر اسکو قریبی ہسپتال لے جایا گیا جہاں وہ انتقال کرگیا۔
چیلنج کی پروموشنل ویب سائٹ پر ایک انتباہ میں کہا گیا ہے کہ یہ چپس صرف بالغ افراد کیلئے ہیں جبکہ ساتھ ہی یہ بھی مشورہ دیا ہے کہ اسکو کھانے کے بعد سانس لینے میں دشواری، بے ہوشی یا متلی کی صورت میں طبی امداد حاصل کریں۔
پولیس نے نوجوان کی موت کے حوالے سے کارروائی شروع کردی ہے تاہم موت کی وجہ کا تعین پوسٹ مارٹم رپورٹ کے بعد کیا جائے گا۔