ایک نیوز : پاکستان سپر لیگ 8 میں کوئٹہ گلیڈی ایٹرز کو بالآخر دوسری فتح مل گئی، کراچی کنگز کو سنسنی خیز مقابلے کے بعد 4 وکٹ سے شکست کا سامنا کرنا پڑا۔ مارٹن گپٹل نے ناقابل شکست 86 رنز کی ذمہ دارانہ اننگز کھیلی۔
کوئٹہ گلیڈی ایٹرز کو 165 رنز کے ہدف کے تعاقب میں ابتدائی اوورز سے ہی مشکلات درپیش رہیں اور اس کی 63 رنز پر 5 وکٹیں گر گئیں تاہم اس موقع پر کپتان سرفراز احمد اور مارٹن گپٹل نے ٹیم کیلئے قیمتی 95 رنز جوڑے۔
مارٹن گپٹل 56 گیندوں پر 4 چھکوں اور 9 چوکوں کی مدد سے 86 رنز بنا کر ناٹ آؤٹ رہے، ڈوین پریٹوریئس نے 3 گیندوں پر 2 چوکوں کی مدد سے 10 رنز بنا ڈالے۔
سرفراز احمد 29، عمیر یوسف 8، محمد نواز 15، افتخار احمد 4، نجیب اللہ زردان ایک اور عمر اکمل 9 رنز بنا کر آؤٹ ہوئے۔
کراچی کنگز کی جانب سے تبریز شمسی نے 2، عامر یامین، جیمز فولر اور محمد موسیٰ نے ایک ایک شکار کیا۔
مارٹن گپٹل کو شاندار بیٹنگ اور جیت میں مرکزی کردار ادا کرنے پر میچ کا بہترین کھلاڑی قرار دیا گیا۔
واضح رہے کہ راولپنڈی میں کھیلے گئے پی ایس ایل 8 کے 22 ویں میچ میں کوئٹہ گلیڈی ایٹرز نے ٹاس جیت کر کراچی کنگز کو بیٹنگ کی دعوت دی۔ کراچی کنگز نے مقررہ 20 اوورز میں 6 وکٹوں کے نقصان پر 164 رنز بنائے۔
کراچی کنگز کو پہلی ہی گیند پر میتھیو ویڈ کی وکٹ کی صورت میں بڑا جھٹکا لگا تاہم ایڈم روزنگٹن نے شاندار بیٹن کی اور 45 گیندوں پر 10 چوکوں اور ایک چھکے کی مدد سے 69 رنز بنا ڈالے، عماد وسیم نے 30 رنز بنائے، عامر یامین نے 11 گیندوں پر 2 چھکوں اور ایک چوکے کی مدد سے 23 رنز بنا ڈالے۔
طیب طاہر 7، قاسم اکرم 8، شعیب ملک 13 اور جیمز فولر 5 رنز بنا کر آؤٹ ہوئے۔
کوئٹہ گلیڈی ایٹرز کی جانب سے نسیم شاہ نے اور ایمل خان نے 2، 2 جبکہ محمد نواز اور نوین الحق نے ایک ایک کھلاڑی کو آؤٹ کیا۔
واضح رہے کہ کوئٹہ گلیڈی ایٹرز 2 پوائنٹس کے ساتھ چھٹی جبکہ کراچی کنگز 4 پوائنٹس کے ساتھ 5ویں پوزیشن پر ہے۔
انہوں نے کہا کہ آج کے میچ میں 4 تبدیلیاں کی گئی ہیں، ول اسمیڈ، یاسر علی، اوڈین اسمتھ اور عمید آصف آج کا میچ نہیں کھیلیں گے، ان کی جگہ عمیر بن یوسف، مارٹن گپٹل، ڈیوین پریٹوریئس اور ایمل خان ٹیم کا حصہ ہوں گے۔
سرفراز احمد نے کہا کہ ہمارے پاس ابھی بھی چانس ہے، فیلڈنگ کو بہتر کرنے کیلئے لڑکوں سے بات کی ہے جس سے رزلٹ بدل سکتا ہے۔
کراچی کنگز کے قائد عماد وسیم کا کہنا ہے کہ ہم ابھی ٹورنامنٹ سے باہر نہیں ہوئے، وکٹ بیٹنگ کیلئے اچھی ہے، 180 سے زائد رنز بنانے ہوں گے۔