ویب ڈیسک: پاکستان کرکٹ بورڈ کے بورڈ آف گورنرز کے 72 ویں اجلاس میں بجٹ کی منظوری دی گئی۔
تفصیلات کے مطابق نیشنل کرکٹ اکیڈمی کے بورڈ روم میں اجلاس منعقد ہوا، چیئرمین پی سی بی محسن نقوی نے بورڈ آف گورنرز کے اجلاس کی صدارت کی۔
اجلاس میں آئی سی سی ٹی 20 ورلڈ کپ میں قومی کرکٹ ٹیم کی کارکردگی اور دیگر انتظامی امور پر تبادلہ خیال کیا گیا اور مالی سال 25، 2024 کے بجٹ کی منظوری دی گئی۔
اجلاس کے دوران چیئرمین پی سی بی محسن نقوی نے بورڈ آف گورنرز کو لاہور، راولپنڈی اور کراچی کے سٹیڈیمز کی اپ گریڈیشن پر بھی آگاہ کیا، اجلاس میں ڈویلپمنٹ بجٹ سے قذافی سٹیڈیم، نیشنل بینک سٹیڈیم کراچی اور راولپنڈی سٹیڈیم کی اپ گریڈیشن پراجیکٹ کیلئے 12 ارب 80 کروڑ روپے مختص کیے گئے جبکہ ڈومیسٹک کرکٹ کے فروغ کیلئے 4 ارب 50 کروڑ روپے کے فنڈز رکھے گئے ہیں ۔
اجلاس میں فیصلہ کیا گیا کہ پی سی بی ڈومیسٹک کرکٹ کے فروغ کیلئے 12 گراؤنڈز کی خود دیکھ بھال کرے گا، پاکستان بھر میں 100 گراؤنڈز کے عملے اور دیکھ بھال کیلئے فنڈز بھی پی سی بی دے گا ۔
پی سی بی کے بورڈ آف گورنرز نے ڈومیسٹک کرکٹ کے کھلاڑیوں کے کنٹریکٹ اور ویمن کرکٹرز کے سنٹرل کنٹریکٹ میں اضافے کی منظوری دے دی ۔ اجلاس میں ویمن کرکٹ کا بجٹ پہلی بار 70 لاکھ روپے سے بڑھا کر 2 کروڑ 40 لاکھ روپے کر دیا گیا ہے ۔
اجلاس میں اگلے سال پاکستان میں آئی سی سی چیمپئنز ٹرافی کی تیاریوں کے بارے بریفنگ دی گئی ، قذافی سٹیڈیم ، نیشنل بینک سٹیڈیم کراچی اور راولپنڈی سٹیڈیم کی اپ گریڈیشن پراجیکٹ پر بھی بریف کیا گیا۔
اجلاس کے دوران گفتگو کرتے ہوئے چیئرمین پی سی بی محسن نقوی کا کہنا تھا کہ چیمپئنز ٹرافی سے قبل سٹیڈیمز کی اپ گریڈیشن کا کام مکمل کیا جائے گا، سٹیڈیمز کی اپ گریڈیشن سے شائقین کرکٹ کیلئے سہولتیں بہتر ہوں گی، چیمپئنز ٹرافی کے لئے انٹرنیشنل معیار کے مطابق انتظامات کئے جائیں گے، ٹورنامنٹس اور میچوں کے نئے وینیوز پر کام کر رہے ہیں۔
چیئرمین پی سی بی محسن نقوی نے ڈومیسٹک و وویمن کرکٹ کو مضبوط بنانے کیلئے کئے گئےاقدامات کے بارے آگاہ کیا، ڈومیسٹک کرکٹ کی بہتری کیلئے مختلف تجاویز پر غور کیا گیا۔
سیکرٹری بورڈ و چیف آپریٹنگ آفیسر پی سی بی سلمان نصیر اور چیف فنانشل آفیسر جاوید مرتضی نے بجٹ کے اہم خدوخال اور دیگر اموربارے بریفنگ دی۔
اجلاس میں بورڈ آف گورنرز کے ممبران چیف سیکرٹری پنجاب زاہد اختر زمان، سجاد علی کھوکھر، ظفر اللہ، تنویر احمد، طارق سرور، ڈاکٹر انوار احمد خان، محمداسماعیل قریشی نے شرکت کی، معراج محمود، اسامہ اظہر اور ڈائریکٹر ڈومیسٹک کرکٹ عبداللہ خرم نیازی بھی اجلاس میں شریک ہوئے۔