ایک نیوز: مسلم لیگ ن کی نائب صدر مریم نواز کا کہنا ہےکہ پرویز مشرف دنیا سے جاچکے ان کا معاملہ اللہ کے سپرد ہے۔ پرویز مشرف کے دور میں منتخب وزیراعظم کے ساتھ جو ہوا اس سے قوم نےکیا سیکھا سب کو پتہ ہے، عوام کو پتہ چل گیا کہ ڈکٹیٹر شپ سے کیا نقصان ہوا۔
ملتان میں میڈیا سے گفتگو میں مسلم لیگ (ن) کی چیف آرگنائزر مریم نواز شریف کا کہنا ہےتھا کہ ہم عوام کو ریلیف دینا بھی چاہیں تو نہیں دے سکتے۔
مریم نواز نے کہا کہ عمران خان نے آئی ایم ایف سے ایسا معاہدہ کیا گیا جس میں پاکستان کو گروی رکھ دیاگیا، ایسا لگتا تھا پاکستان کو حکومت نہیں آئی ایم ایف چلارہا ہے، عمران خان خود کو بچاکر پاکستان کو مہنگائی میں جھونک گئے۔
مریم نواز نے کہا کہ مسلم لیگ ن کی تاریخ ہے کہ ہم نے ہمیشہ عوام کو ریلیف دیا، پی ٹی آئی حکومت کے 4سال میں ملکی معیشت کو تباہ کیا گیا، آئی ایم ایف شرائط پوری کرنےکے لئے سمجھوتا کرنا پڑا، آئی ایم ایف کی شرائط ماننا ہماری مجبوری ہے، ہم ریلیف دینا بھی چاہیں توعوام کو ریلیف نہیں دے سکتے، تباہ حال معیشت کو ٹھیک کرنے میں کچھ وقت لگے گا۔
مہنگائی کے حوالے سے شہباز شریف کی حکومت وفاق میں ہے، مہنگائی کنٹرول کرنا صوبوں کاکام ہے ، پنجاب چنددن پہلےتک عمران خان کےپاس تھا، خیبر پختونخوا میں حکومت 10سال تک عمران خان کے پاس تھی، پھرساری مہنگائی کاذمہ دار شہباز شریف کیوں ہے۔
عمران خان پر طنزکرتے ہوئے مریم نواز کا کہنا تھا کہ ہم انتظار کر رہے ہیں کہ یہ جیل بھریں اور شروعات زمان پارک سے کریں، ہم نظریں بچھائے بیٹھے ہیں ، آئیں جیل بھریں، فرنٹ لائن پر انہوں نے خواتین کو رکھا ہوا ہے، خود سامنے آئیں، قانون اپنا راستہ لےگا، جو جرائم کیے ان کی سزا بھگتنا پڑے گی، رانا ثنااللہ نے جعلی مقدمے میں 6 ماہ قیدکاٹی، انہیں ابھی کسی نے انگلی نہیں لگائی، یہ دو دن کی قید میں گلے لگ کر رونے لگ گئے ہیں۔
مریم نوازکا کہنا تھا کہ نواز شریف کو 2017 میں ایک اقامہ پر نکالا گیا، پانامہ کیس میں ہفتہ میں پانچ دن پیشی پر ہوتے تھے، ایک دن میں دو دو بار عدالت جاتے، دوسری طرف اقامہ نہیں ہیرے اور فارن فنڈنگ ہے، ناجائز پیسے کے ثبوت بھرے پڑے ہیں، آج بدنام زمانہ کیس میں بھی وہ عدالت نہیں آتے، ایسی سہولت کیا نواز شریف کو تھی، کیا یہ سہولت مریم کو تھی، سب جانتے ہیں کیسز جھوٹے تھے ہمارے ساتھ انتقام لیا گیا۔
’کارکن تیاری کریں‘، عمران خان کا جیل بھرو تحریک کا اعلان
چیف آرگنائزر مسلم لیگ ن کا کہنا تھا کہ ہمیں احساس ہے کہ ملک میں مشکل حالات ہیں، سب جانتے ہیں مشکلات کس کی وجہ سے ہیں، مہنگائی کم کرنا، قیمتیں کنٹرول کرنا صوبےکا کام ہے، پنجاب، خیبر پختونخوا اور آزادکشمیر بھی تحریک انصاف کے پاس رہے، یہ تمام ملبہ شہباز شریف پر ڈال کر چلے جاتے ہیں۔
ان کا مزید کہنا تھا کہ ملک کو بیرونی کوئی خطرہ نہیں، ملک میں جب تک استحکام نہیں آئےگا، ترقی نہیں آئےگی، ساری جماعتیں ایک صفحہ پر ہیں، ہم جھوٹے وعدے نہیں کریں گے اور جھوٹی تسلیاں نہیں دیں گے، جو وعدے کریں گے وفا کریں گے۔