انسانی حقوق کونسل میں اسرائیل پر پابندیوں کیلئے پاکستانی قرارداد منظور

 ویب ڈیسک: اقوام متحدہ کی انسانی حقوق کونسل نے اسرائیل پر پابندیوں کیلئے پاکستان کی پیش کی گئی قرارداد منظور کر لی۔
غیرملکی میڈیا رپورٹس کے مطابق پاکستان کی جانب سے قرارداد اسلامی تعاون تنظیم کے ذریعے اقوام متحدہ کی انسانی حقوق کونسل میں پیش کی گئی، قرارداد کے حق میں 47 رکن ممالک میں سے 28 نے ووٹ دیا، 3 نے مخالف کی اور 13 نے ووٹنگ میں حصہ نہیں لیا۔
منظور ہونے والی قرارداد میں اسرائیلی حملوں کو نسل کشی کے مترادف قرار دیا گیا جس میں بچوں، خواتین سمیت 33,000 سے زائد افراد جاں بحق ہو چکے ہیں، قرارداد میں عالمی برادری سے اسرائیل کو ہتھیاروں کی فروخت روکنے کا مطالبہ کیا گیا ہے۔
قرارداد میں کہا گیا کہ عالمی عدالت انصاف نے جنوری میں فیصلہ دیا تھا کہ غزہ میں نسل کشی کا خطرہ ہے، اسرائیل کو ہتھیاروں، گولہ بارود اور دیگر فوجی ساز و سامان کی فروخت، منتقلی یا فراہمی روکی جائے تاکہ انسانی حقوق کی خلاف ورزیوں کو روکا جا سکے۔
یاد رہے کہ یہ پہلی مرتبہ ہے اقوام متحدہ کے اہم ذیلی ادارے نے فلسطینیوں کی نسل کشی کے معاملے پر واضح مؤقف اختیار کیا ہے، اقوام متحدہ میں اسرائیلی سفیر نے قرارداد کی مذمت کرتے ہوئے اسے انسانی حقوق کونسل اور مجموعی طور پر اقوام متحدہ کیلئے ایک داغ قرار دیا۔