ایک نیوز :ملک کے نئے صدر کا انتخاب 9 مارچ کو ہوگا ،جس کیلئے پولنگ صبح دس سے شام پانچ بجے تک پارلیمنٹ ہاؤس اور چاروں صوبائی اسمبلیوں میں ہوگی۔
صدارتی انتخاب کے لیے 7 امیدواروں کی جانب سے کاغذات نامزدگی جمع کرائے گئے تھے جن میں پی پی کی جانب سے سابق صدر آصف علی زرداری، سنی اتحاد کونسل کی جانب سے محمود خان اچکزئی نے کاغذات نامزدگی جمع کرائے تھے۔ان کے علاوہ اصغر علی مبارک، عبدالقدوس اور وحید احمد کمال سمیت 5 امیدواروں نے آزاد حیثیت میں کاغذات نامزدگی جمع کرائے تھے ۔
سیاسی گہماگہمی عروج پر
صدارتی الیکشن سے قبل سیاسی گہما گہمی عروج پر پہنچ گئی ، سیاسی رہنماؤں کی ملاقاتیں جاری ہیں ۔سنی اتحاد کونسل کے نامزد امیدوار برائے صدر محمود خان اچکزئی سے عمر ایوب، اسد قیصراور سنی اتحاد کونسل کے دیگر رہنماؤں نے ملاقات کی ، ملاقات پارلیمنٹ ہائوس میں اپوزیشن لیڈر کے چیمبر میں ہوئی ، ملاقات میں صدارتی انتخاب پر مشاورت کی گئی۔
دوسری جانب حکومتی مذاکراتی وفد چیئرمین سینیٹ چیمبر پہنچاجہاں انہوں نے چیئر مین سینیٹ صادق سنجرانی سے ملاقات کی، حکومتی وفد میں یوسف رضا گیلانی، اسحاق ڈار، خورشید شاہ، نوید قمر، اعظم نذیر تارڑ شامل تھے، ملاقات میں بلوچستان عوامی پارٹی کے صد خالد مگسی، سنیٹر عبدالقادر، پرنس عمر احمد زئی شامل تھے، ملاقات میں حکومتی وفد نے صدارتی انتخابات پر حمایت کی درخواست کی، بلوچستان عوامی پارٹی نے صدارتی انتخابات پر حکومتی امیداور کی حمایت کی یقین دہانی کرادی۔