امریکی صدرکاغزہ پٹی پر قبضہ کرنیکا اعلان 

ویب ڈیسک: امریکی صدر ڈونلڈ ٹرمپ نے غزہ پٹی پر طویل عرصے تک قبضہ کرنے کا اعلان کر دیا۔
گزشتہ روز ٹرمپ نے اسرائیلی وزیر اعظم نیتن یاہو کے ساتھ وائٹ ہاؤس میں ملاقات کی ،ملاقات کے بعد مشترکہ پریس کانفرنس کرتے ہوئے ان کا کہنا تھا کہ امریکا غزہ کی پٹی پر قبضہ کر لے گا، ہم اس کے مالک ہوں گے۔
ٹرمپ نے کہا کہ غزہ پر قبضہ کرنے کا مقصد علاقے میں استحکام لانا اور ہزاروں ملازمتیں پیدا کرنا ہے،
میں غزہ میں طویل المدتی ملکیت کی پوزیشن دیکھتا ہوں، ہم غزہ کو ترقی دیں گے،علاقے کے لوگوں کیلئے ملازمتیں دیں گے ،فلسطینیوں کیلئےمنصوبے کے تحت اردن اور مصر کے رہنما جگہ فراہم کریں گے۔
امریکی صدر نے کہا کہ اپنے منصوبے کے بعد غزہ میں دنیا بھر کے لوگوں کو آباد ہوتے دیکھنا چاہتا ہوں ،اسرائیل، غزہ اور سعودیہ کا دورہ کروں گا، سعودی عرب بہت مددگار ثابت ہوگا، ہمیں امید ہے کہ جنگ بندی برقرار رہے گی، بہت سے ممالک جلد ہی ابراہام معاہدے میں شامل ہوں گے۔
ٹرمپ کا کہنا تھا کہ نیتن یاہو کے ساتھ ملاقات میں ہم نے حماس کے خاتمے کو یقینی بنانے کے طریقے پر تبادلہ خیال کیا، غزہ کو دوبارہ تعمیر کرنے اور اس پر قبضہ کرنے کا عمل انہی لوگوں کے ذریعے نہیں ہونا چاہیے۔
ٹرمپ نے مزید کہا کہ ایران کے ساتھ ڈیل کرنا پسند کروں گا،اگر لگا کہ ایران کے پاس جوہری ہتھیار ہیں تو یہ ان کی بدقسمتی کا باعث ہوگا۔
دوسری جانب اسرائیلی وزیر اعظم نیتن یاہو نے کہا کہ امریکی صدر کافلسطینی علاقے غزہ پٹی کا کنٹرول سنبھالنے کا منصوبہ تاریخ بدل سکتا ہے، ٹرمپ غزہ کا مختلف مستقبل دیکھتے ہیں، یہ قابلِ توجہ ہے اور تاریخ بدل سکتا ہے۔