ایک نیوز: سرکاری ملازمت کے خواہشمند نوجوانوں کو وزیراعلیٰ پنجاب نے خوشخبری سنادی۔
تفصیلات کے مطابق وزیر اعلیٰ پنجاب چودھری پرویز الٰہی سے یونائیٹڈ نیشن پاپولیشن فنڈ کے ملکی نمائندہ ڈاکٹر لوئے شبانے ((Dr. Luay Shabaney نے ملاقات کی۔ جس میں پاپولیشن ویلفیئر خصوصاً فیملی پلاننگ کیلئے باہمی اشتراک کو مزید موثر بنانے پر اتفاق کیا گیا۔
اس موقع پر وزیراعلیٰ چودھری پرویز الٰہی نے محکمہ پاپولیشن ویلفیئر کی منظور شدہ خالی آسامیوں پر بھرتی کا اعلان کرتے ہوئے کہا کہ محکمہ پاپولیشن ویلفیئر کو مکمل سپورٹ کریں گے۔
چودھری پرویز الٰہی کا مزید کہنا تھا کہ مربوط اور مشترکہ کاوشوں کے ذریعے ہی فیملی پلاننگ کے اہداف حاصل کئے جا سکتے ہیں۔ دیہات کے ساتھ شہروں کے پسماندہ علاقوں میں بھی فیملی پلاننگ کی اہمیت کو اجاگر کیا جائے گا۔ فیملی ہیلتھ کلینکس اور فلاحی مراکز کو مزید فعال کیا جائے گا۔
انہوں نے مزید کہا کہ فیملی پلاننگ کے اقدامات کی تحصیل اور ضلع کی سطح پر باقاعدہ مانیٹرنگ کی جائے گی۔ پنجاب حکومت نے فیملی پلاننگ اختیار کرنے والے خاندانوں کو خصوصی پیکیج دینے کا فیصلہ کیا ہے۔ خصوصی پیکیج پنجاب احساس پروگرام کے تحت دیا جائے گا۔
ان کا کہنا تھا کہ آبادی کے ساتھ تیزی سے بڑھتے مسائل کرہ ارض پر انسانی بقاء کے لئے خطرہ ہیں۔ آبادی میں بے ہنگم اضافہ صحت، تعلیم اور روزگارکے مسائل کو ترویج دیتا ہے۔ آبادی سے متعلقہ مسائل پر قابو پانے کے لئے حکومتی کاوشوں کے ساتھ عوام کا تعاون ناگزیر ہے۔ آبادی پر قابو پا کر عوام کے معیار زندگی کو بہتر بنایا جا سکتا ہے۔ سماج میں بہبود آبادی کا شعور بیدار کرنا معاشرے کے ہر فرد کی ذمہ داری ہے۔
اس موقع پر ڈاکٹر لوئے شبانے کا کہنا تھا کہ وزیراعلیٰ پنجاب چودھری پرویز الٰہی کی قیادت میں پنجاب حکومت پاپولیشن ویلفیئر کیلئے مثالی اقدامات کر رہی ہے۔ ہمیں خوشی ہے کہ وزیراعلیٰ چودھری پرویز الٰہی کے پاپولیشن ویلفیئر کیلئے پروگرامز کے حوصلہ افزا نتائج سامنے آ رہے ہیں۔ پاپولیشن ویلفیئر کے حوالے سے پنجاب حکومت کے ساتھ قریبی اشتراک سے مزید کام جاری رکھیں گے۔
چیف سیکرٹری عبداللہ خان سنبل، سیکرٹری پاپولیشن ویلفیئر سلمان اعجاز، سیکرٹری پرائمری و سیکنڈری ہیلتھ ڈاکٹر ارشاد، ڈی جی پاپولیشن ویلفیئر ثمن رائے، پروگرام اینڈ ٹیکنیکل سپیشلسٹ شعیب احمد شہزاد، ٹیکنیکل سپیشلسٹ جینڈرثانیہ درانی اور متعلقہ حکام بھی اس موقع پر موجود تھے۔