ویب ڈیسک: اہل غزہ کے لیے پاکستان کی جانب سے امدادی سامان کی پانچویں کھیپ روانہ کردی گئی۔
تفصیلا ت کے مطابق فلسطینیوں کی مدد کے لیے ضروری سامان پر مشتمل کھیپ خصوصی پرواز کے ذریعے نورخان ائربیس سے روانہ کی گئی، جس میں غزہ کی زمینی ضروریات کے مطابق موسم سرما کے لیے گرم خیمے، ترپال اور کمبل شامل ہیں۔
خصوصی پرواز امدادی سامان لے کر مصر کے شہر العریش پہنچے گی، جہاں پاکستانی سفیر امدادی سامان وصول کریں گے۔ امدادی سامان بعد میں تقسیم کے لیے غزہ روانہ کر دیا جائے گا۔امداد روانہ کرنے کے موقع پر این ڈی ایم اے، وزارت خارجہ اور مسلح افواج کے افسران نے نور خان ائربیس پر روانگی کی تقریب میں شرکت کی۔
واضح رہے کہ این ڈی ایم اے کی جانب سے6 فروری کو100 ٹن امدادی سامان کی چھٹی امدادی کھیپ کا بھی انتظام کیا گیا ہے جو کراچی سے مصر کے لیے روانہ ہوگی۔ پاکستان کی جانب سے اب تک غزہ کے مصیبت زدہ عوام کے لیے 5 پروازوں کے ذریعے مجموعی طور پر 230 ٹن امدادی سامان روانہ کیا جا چکا ہے۔ غزہ کے لیے مزید امدادی سامان کا بھی انتظام کیا جا رہا ہے جو بہت جلد پاکستانی عوام کی جانب سے بھیجا جائے گا۔