ایک نیوز:وزیراعلیٰ پنجاب مریم نواز شریف نے ہمت کارڈ منصوبے کا باضابطہ افتتاح کردیا۔
تفصیلات کے مطابق ہمت کارڈ منصوبے کی افتتاحی تقریب سے خطاب کرتے ہوئے وزیراعلیٰ پنجاب مریم نواز شریف کا کا کہنا تھا کہ اللہ تعالیٰ کی شکرگزار ہوں ایک اور خواب کی تکمیل ممکن ہوئی، خصوصی افراد کوقومی دھارےمیں شامل کرنا ترجیح ہے، صوبے میں 65 ہزارخصوصی افراد کوہمت کارڈ دیئے جائیں گے۔
انہوں نے کہا کہ ہمت کارڈ منصوبے کیلئے 2 ارب 60 کروڑ روپے رکھے گئے ہیں، ہمت کارڈ کےحامل افراد کو3ماہ میں ساڑھے 10ہزار روپے ملیں گے، پنجاب حکومت خصوصی افراد کوتنہا نہیں چھوڑے گی، مسائل حل کریں گے، ہمت کارڈ کے ذریعے ملنے والی رقم کوبڑھائیں گے، ہمت کارڈ کے ذریعے میٹروبس میں فری سفرکی سہولت بھی میسرہوگی۔
مریم نواز کا کہنا تھا کہ کیا وجہ ہے (ن) لیگ کے دور میں ملک ترقی کرتا ہے، مسلم لیگ ن کے دور میں موٹرویز بنتی ہیں، مہنگائی مسلم لیگ (ن) کے دور میں تیزی سے نیچے جاتی ہے، گزشتہ حکومت کی نااہلی کی وجہ سے مہنگائی 38 فیصد پر تھی، آج مہنگائی مسلسل کم ہورہی ہے روٹی کی قیمت پہلے 25 روپے تھی اور آج 12 روپے ہے۔
وزیراعلیٰ پنجاب نے کہا کہ مسلم لیگ (ن) کے پاس جادو کی چھڑی نہیں، ہم ہمیشہ عوام کو ریلیف دینے کا سوچتے ہیں، خیبرپختونخوا کےعوام کیلئے میرا دل دھڑکتا ہے، خیبرپختونخوا میں روٹی 25 روپے کی ہو گئی ہے، ذہنی مفلوج لوگوں سے کام ہوتا ہے نہ کسی کو کرنے دیتے ہیں۔
انہوں نے پی ٹی آئی قیادت کو تنقید کا نشانہ بناتے ہوئے کہا کہ ان کا کام صرف جلاؤ گھیراؤ کرنا ہے، مجھےفرق نہیں پڑتا لیکن ان کے ہرروز کے ڈراموں سے عوام کی خدمت میں خلل آتا ہے،یہ دوسرے صوبے پر حملہ کرنے کے بجائے خیبرپختونخوا کے عوام کی خدمت کریں۔
مریم نواز کا کہنا تھا کہ ان کی جانب سے 20 ہزارشیل پنجاب پولیس پر چلائے گئے، یہ لوگ پنجاب کے اوپر باربار حملہ کررہےہیں، ریسکیو 1122 کا کام مریضوں کو ہسپتال منتقل کرنا ہوتا ہے، ریسکیو 1122 کی گاڑیوں کو جلسوں میں لایا جاتا ہے، مجھے پنجاب کےعوام کی فکرہےتم اپنی فکرکرو۔
انہوں نے مزید کہا کہ خیبرپختونخوا کےعوام مجھے خط لکھتے ہیں، خیبرپختونخوا کے عوام کا پیسہ اپنی سیاست چمکانے کیلئے خرچ کیا جارہا ہے، یہ لوگ ایک صوبے کو دوسرے صوبے سے لڑانے کی مذموم کوشش کر رہے ہیں، کسی بھول میں نہ رہنا، مجھے دہشت گردوں سےنمٹنا آتا ہے۔