ایک نیوز: سپریم کورٹ میں اوورسیز پاکستانیوں کو ووٹ کا حق دینے سے متعلق سماعت کے دوران نادرا نے رپورٹ جمع کروا دی،عدالت نے کیس کی سماعت غیرمعینہ مدت کیلئے ملتوی کردی۔
تفصیلات کے مطابق سپریم کورٹ آف پاکستان نے اوورسیز پاکستانیوں کے ووٹ کے حق کے کیس میں عمران خان اور شیخ رشید سے جواب طلب کر لیا۔
سپریم کورٹ میں اوورسیز پاکستانیوں کو ووٹ کا حق دینے کی درخواستوں پر جسٹس اعجازالاحسن کی سربراہی میں 3 رکنی بینچ نے سماعت کی۔عوامی مسلم لیگ کے سربراہ شیخ رشید دورانِ سماعت سپریم کورٹ میں پیش ہوئے۔ اوورسیز پاکستانیوں کو ووٹ کا حق دلوانے شیخ رشید سپریم کورٹ پہنچ گئے۔
سپریم کورٹ نے استفسار کیا کہ اوورسیز پاکستانیوں کو ووٹ کے حق کے قانون میں ترمیم آئینی طور پر کیسے درست نہیں؟
شیخ رشید کے وکیل نے کہا کہ الیکشن کمیشن نے اوورسیز پاکستانیوں کے ووٹ کا معاملہ روک رکھا ہے، الیکشن کمیشن اوورسیز پاکستانیوں کو ووٹ کا حق دینے کے اقدامات کر لے تو کوئی رکاوٹ نہیں۔
جسٹس منیب نے ریمارکس دیتے ہوئے کہا کہ ہائیکورٹ نے اوورسیز پاکستانیوں کا حق لینے کی ترامیم پر درخواست خارج کر دی تھی، پارلیمان نے 2017ء میں الیکشن ایکٹ بنایا، سمندر پار پاکستانیوں کے حق سے متعلق الیکشن ایکٹ کا سیکشن 94 واضح ہے، سپریم کورٹ نے 2018ء میں سیکشن 94 کو آئین کے مطابق قرار دیا تھا، 2021ء میں قانون کو مزید بہتر کیا گیا، 2022ء میں پارلیمنٹ واپس پرانی سطح پر لے آئی، سپریم کورٹ نے پہلے جس قانون کو آئینی قرار دیا اب غیر آئینی کیسے قرار دے؟
وکیل نے کہا کہ نادرا کے مطابق الیکشن کمیشن معاہدہ کرے تو ایک سال میں آئی ووٹنگ کا سسٹم بنا سکتے ہیں، پہلے بھی نادرا نے 1 سال کا وقت مانگا تھا، عدالت کے کہنے پر 6 ماہ میں سسٹم بنا۔
وکیل عارف چودھری نے کہا کہ 2017ء میں ہونے والے پائلٹ پراجیکٹ پر کوئی اعتراض سامنے نہیں آیا، الیکشن کمیشن نے اب تک دوبارہ کوئی پائلٹ پراجیکٹ نہیں کیا۔
عدالت نے ریمارکس دیئے کہ فریقین کے جوابات آ جائیں تو عمل درآمد کا جائزہ بھی لیں گے۔
جسٹس منیب اختر نے استفسار کیا کہ کیا الیکشن ایکٹ میں ترمیم سے بنیادی انسانی حقوق متاثر ہوئے؟ پارلیمنٹ اپنے بنائے ہوئے قانون میں ترمیم کر رہا ہے تو عدالت مداخلت کیوں کرے؟ عدالتی آبزرویشن کچھ بھی ہوں مگر پارلیمنٹ کی ہر قانون سازی آئینی تصور ہوتی ہے۔
جسٹس اعجاز الحسن نے ریمارکس دیئے کہ آپ نے تو اوورسیز ووٹ کے حق کے قانون کو ہی کالعدم قرار دینے کی درخواست کر دی ہے۔
جسٹس مظاہر علی اکبر نقوی نے ریمارکس میں کہا کہ آپ اپنی ترمیمی درخواست جمع کرا دیں۔
جسٹس منیب اختر نے ریمارکس دیتے ہوئے کہا کہ بنیادی حقوق کی خلاف ورزی پر دائر درخواست واضح ہونی چاہیے، کیا کوئی آئینی ضابطہ پارلیمنٹ کو قانون اصل حالت میں بحال کرنے سے روکتا ہے؟
جسٹس منیب اختر نے وکلاء کو ہدایت کی کہ عدالتی سوالات پر تیاری کر کے آئیں۔
سپریم کورٹ نے عمران خان اور شیخ رشید کو جواب جمع کرانے کا وقت دے دیا، الیکشن کمیشن کو بھی اوورسیز پاکستانیوں کے ووٹ کے حق پر پیش رفت جمع کرانے کی ہدایت کر دی۔
عدالتِ عظمیٰ نے اوورسیز پاکستانیوں کو ووٹ کے حق سے متعلق درخواستوں پر سماعت غیر معینہ مدت کے لیے ملتوی کر دی۔