ٹانگوں کی مضبوطی سےحرکت قلب بند ہونے کا امکان کم ہوجاتاہے

ایک نیوز: نئی تحقیق سے پتہ چلا ہے کہ مضبوط ٹانگوں والے افراد میں دل کا دورہ پڑنے کے بعد حرکتِ قلب بند ہونے کا امکان کم ہوجاتا ہے۔
تفصیلات کےمطابق جاپان میں کیتاساٹو یونیورسٹی سکول آف الائیڈ ہیلتھ سائنسز میں بحالیِ صحت کے شعبہ کے کینسوک یوینو اور ڈاکٹر کینٹارو کامیا کا مطالعہ رواں ماہ کے شروع میں یورپی سوسائٹی آف کارڈیالوجی کی ایک سائنسی کانگریس ہارٹ فیلیئر 2023 کے دوران پیش کیا گیا۔
ڈاکٹر کینٹارو نے 57 سے 74 سال کی عمر کے 932 افراد کے quadriceps (رانوں کے اگلے حصے میں پٹھوں) کی طاقت کا مطالعہ کیا جو 2007 اور 2020 کے درمیان دل کے دورے کی وجہ سے ہسپتال میں داخل ہوئے تھے۔
تجزیے سے پتا چلا ہے کہ جن کی ٹانگوں میں طاقت کم ہوتی ہے ان میں حرکت قلب بند ہونے کا امکان زیادہ ہوتا ہے بنسبت ان کے جن کی ران کے پٹھے زیادہ قوی ہوتے ہیں۔
ٹانگوں کی مضبوطی بہت سے فوائد کی حامل ہے خاص طور پر جب بڑھتی عمر کی بات آتی ہے، تو نہ صرف دل کی صحت کے لیے بلکہ مجموعی صحت کے لحاظ سے بھی ضروری ہے۔ اس کے علاوہ ٹانگوں کی ورزش دیگر احتیاطی تدابیر کے مقابلے میں وزن کی کمی کیلئے زیادہ موثر ہوتی ہے۔