ورلڈ کپ سے باہر ہونے پر ویسٹ انڈیز ٹیم کو سخت تنقید کا سامنا

ایک نیوز :ویسٹ انڈیز کرکٹ ٹیم کے ورلڈ کپ سے باہر ہوتے ہی مقامی اور سابق کرکٹرز نے توپوں کا رخ ویسٹ انڈین کرکٹ بورڈ کی طرف کر لیا۔

تفصیلات کےمطابق ویسٹ انڈیز کرکٹ ٹیم کے سابق کپتان کارلوس بریتھ ویٹ نے تنقید کرتے ہوئے کہا کہ یہ وہ کم ترین جگہ ہے جہاں آپ جا سکتے ہیں، یہ چیز عرصہ دراز سے ہماری طرف بڑھ رہی تھی۔ کارلوس بریتھ ویٹ نے کہا کہ گزشتہ برس ٹی ٹوئنٹی فارمیٹ کا سپر 12 مرحلہ مِس کیا، وائٹ بال کرکٹ میں گزشتہ برسوں سے مشکلات رہی ہیں۔

انہوں نے کہا کہ ویسٹ انڈیز کرکٹ کو بے شمار مسائل کا سامنا ہے، ٹیلنٹ کی شناخت نہ کر پانا مسائل میں سے ایک ہے۔ سابق کرکٹر اور کمنٹیٹر این بشپ نے کہا ہے کہ یہ ڈرامائی انداز سے اپنے ایک مقام سے گرنا ہے، ویسٹ انڈیز ٹیم ون ڈے اور ٹی ٹوئنٹی ورلڈ کپ دو دو بار جیت چکی ہے۔ این بشپ نے کہا کہ کپتان تبدیل کرو، کوچ تبدیل کرو، جو چاہے تبدیلی لاؤ لیکن نتائج توقعات کے برعکس ہیں۔

انہوں نے یہ بھی کہا کہ ویسٹ انڈیز کی ٹیم بلند عزائم کے ساتھ کوالیفائنگ راؤنڈ کھیلنے کے لیے گئی لیکن اس کی کارکردگی انتہائی مایوس کن رہی۔