ایک نیوز: پاکستان تحریک انصاف (پی ٹی آئی) نے جیفری رابرٹسن کی خدمات ختم کرنے کا فیصلہ کرلیا۔
پی ٹی آئی نے جیفری رابرٹسن کو چیئرمین پی ٹی آئی عمران خان کا وکیل مقرر کرنے کا اعلان کیا تھا۔ڈاؤٹی اسٹریٹ چیمبر نے جیفری رابرٹسن کو عمران خان کا وکیل مقرر کرنے کا ٹوئٹ ڈیلیٹ کردیا اور ڈاؤٹی اسٹریٹ چیمبر نے تصدیق کی کہ کلائنٹ کے کہنے پر متعلقہ ٹوئٹ آج صبح ڈیلیٹ کیا۔
شدید دباؤ آنے پرپی ٹی آئی نے ٹوئٹر ہینڈل سے بھی ٹوئٹ ہٹا دیا اور جیفری رابرٹسن کے ڈاؤٹی اسٹریٹ چیمبر سے بھی ٹوئٹ ڈیلیٹ کرنے کو کہا۔پی ٹی آئی نے پارٹی چیئرمین کا معاملہ اقوام متحدہ اور عالمی عدالت انصاف میں لے جانے کیلئے جیفری رابرٹسن کی خدمات لینے کا اعلان کیاتھا۔
جیفری رابرٹسن کے چیمبرکے مطابق کیس پرابتدائی گفتگو کیلئے 25 ہزار پاؤنڈ ادا کیے گئے اور اس حوالے سے ڈاؤٹی اسٹریٹ چیمبر کا کہنا ہے کہ کیس آگے لے جانے کیلئے ہدایات کا انتظار ہے، ابتدائی معاوضہ لندن میں پارٹی کے ایک رہنما نے ادا کیا۔
ذلفی بخاری نے 3 روز قبل لندن میں دعویٰ کیا تھاکہ پارٹی چیئرمین کا کیس عالمی سطح پر اٹھانے سے متعلق جلد بڑی خبر دیں گے اور انہوں نے ایک درجن سے زائد صحافیوں کے سامنے کہا تھا کہ وہ بڑی قانونی کارروائی شروع کرنے جارہے ہیں۔
پی ٹی آئی کے ذرائع کے مطابق ذلفی بخاری نے جیفری رابرٹسن سے کہا ہے کہ وہ ان کی خدمات کے حوالے سے غور کرکے مطلع کرینگے۔
ذرائع کے مطابق جیفری رابرٹسن کی خدمات حاصل کرنے کا فیصلہ عمر ایوب اور ذلفی بخاری نے عمران خان کی مشاورت کے بعد کیا تھا اور جیفری رابرٹسن کی عمر ایوب اور ذلفی بخاری کے درمیان زوم پر میٹنگز ہوئیں۔