ایک نیوز: قطر میں ہونے والے فٹبال ورلڈکپ کی ٹرافی اٹھانے کے بعد ارجنٹائن کے اسٹار فٹبالر لیونل میسی نے ایک اور اعزاز اپنے نام کر لیا ہے۔
رپورٹ کے مطابق سٹار فٹبالر لیونل میسی نے 2022 کا فیفا پلیئر آف دی ایئر کا ایوارڈ جیت لیا ہے اور انہوں نے یہ اعزاز دوسری بار حاصل کیا ہے۔پیرس میں فیفا ایوارڈ کی تقریب منعقد ہوئی جس میں 2022 کے بہترین کھلاڑیوں کو ایوارڈز سے نوازا گیا۔ فٹبالر آف دی ایئر کی کیٹیگری میں فرانس کے امباپے ، کریم بینزیما اور لیونل میسی کے مابین سخت مقابلہ ہو ا لیکن میسی نے حریفوں کو پیچھے چھوڑتے ہوئے سال کے بہترین فٹبالر کا ایوارڈ اپنے نام کرلیا۔
میسی کی کپتانی میں ارجنٹینا نے گزشتہ سال فیفا ورلڈکپ جیتا اور مختلف کلبز کی نمائندگی کرتے ہوئے 49 مقابلوں میں 27 گولز بھی کیے۔ایوارڈ جیتنے کے بعد لیونل میسی نے کہا کہ یہ ایک زبردست سال رہا ہے۔ میرے لیے اعزاز کی بات ہے کہ میں یہاں ہوں اور یہ ایوارڈ جیتا ہے ساتھی کھلاڑیوں کے بغیر یہ ممکن نہیں تھا۔
میسی نے مزید کہا کہ میں نے اپنا خواب پورا کرلیا ہے جس کی میں اتنے عرصے سے امید کر رہا تھا۔ بہت کم لوگ اسے حاصل کر پاتے ہیں اور میں خوش قسمت ہوں۔
دوسری جانب بارسلونا کی الیکسیا پوٹیلس کو ویمنز پلیئر آف دی ایئر کا ایوارڈ ملا ہے۔ارجنٹائن کے ایمیلیانو مارٹینز نےسال کے بہترین گول کیپر کا ایوارڈ حاصل کیا ہے جبکہ ویمنز میں یہ ایوارڈ انگلینڈ کی میری ایرپس نے حاصل کیا ہے۔ مارٹینز نے ارجنٹائن کے ورلڈکپ جیتنے میں اہم کرادار ادا کیا تھا۔